Foto de familia no peche do acto da Real Academia Galega de Ciencias.

O presidente da RAGC pide un pacto de país pola ciencia

Lema advertiu de que a produción e o impacto científico das universidades galegas leva anos evolucionando a un ritmo moito menor que as de Portugal

O presidente da Real Academia Galega de Ciencias (RAGC), Juan M. Lema Rodicio, fai unha chamada urxente á reflexión política, social e empresarial sobre a necesidade de establecer un pacto de país pola ciencia. Durante o acto de apertura do curso académico, celebrado esta tarde en Santiago, Lema botou man dunha análise realizada pola institución sobre a produción científica das tres universidades galegas e o impacto desta, en comparación coa doutras universidades da península ibérica e do resto de Europa. 

Segundo destacou, as universidades galegas levan máis dunha década mostrando unha evolución nestes indicadores que evidencia unha distancia cada vez maior, por exemplo, en relación coas do norte de Portugal. Cun número menor profesores, a produción e o impacto da investigación foron prácticamente o dobre nas universidades lusas que nas galegas en 2018.

O acto de apertura da RAGC, presidido polo titular da Xunta, Alberto Núñez Feijóo, acompañouse do ingreso de cinco novos académicos correspondentes e contou coa lección maxistral “A xeoloxía e o cambio climático na Terra”, a cargo de Juan Ramón Vidal Romaní.

Luis Liz Marzán, Xosé Ramón Bustelo, Aníbal Figueiras, Beatriz González e Manuel de León pasaron esta tarde a formar parte da súa nómina de científicos e científicas galegos –ou cunha estreita vinculación a Galicia– de recoñecido prestixio nas súas áreas de coñecemento e que exercen a súa actividade investigadora en centros de referencia no resto de España ou no estranxeiro, con capacidade para contribuír á promoción da ciencia en Galicia a través da RAGC.

Ao acto asistiron, entre outras autoridades, a conselleira de Educación, Universidade e FP, Carmen Pomar; o reitor da Universidade da Coruña, Julio Abalde; a presidenta do Consello da Cultura Galega, Rosario Álvarez; os vicerreitores de Investigación das Universidades de Santiago e Vigo, Vicente Pérez Muñuzuri e Belén Rubio; e a vicerreitora de Relacións Institucionais da Universidade Carlos III, Matilde Sánchez.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.