Xoves 28 Marzo 2024

O galego Liz-Marzán obtén por segunda vez a prestixiosa Advanced Grant da UE

Luis Liz-Marzán é o primeiro científico galego que acada por segunda vez a elitista bolsa Advanced Grant, que concede o Consello Europeo de Investigación. E non é a primeira vez na que se converte en pioneiro, porque tamén foi o primeiro galego en conseguir este contrato, que achegará 2,4 millóns de euros para os seus traballos sobre o cancro.

Liz-Marzán é un exemplo de científico que tivo que facer as maletas para prosperar. Foi fichado polo Goberno vasco para dirixir o CIC BiomaGune, un centro de excelencia onde non ten as trabas burocráticas que moitas veces colapsan a investigación nas universidades. Cando traballaba na Universidade de Vigo acadou a súa primeira Advanced Grant, pero a segunda chega agora, tras aceptar a oferta dende Donosti no ano 2012.

Publicidade

O proxecto que agora encara Liz-Marzán titúlase  “Monitoreo en 4D do crecemento tumoral mediante dispersión Raman en superficie”. O seu obxectivo é combinar a ciencia dos materiais cos estudios en medicina, para crear de xeito controlado tecidos que se comporten como tumores. Así poderán ‘crear’ cancros de mama e melanomas, para poder estudar a súa evolución en tempo real e comprender mellor esta enfermidade. Tamén poderán probar os fármacos que mellor funcionan para atallar este cancro.

Liz-Marzán é doutor pola Universidade de Santiago e investigou na UVigo

Liz-Marzán estudou Química na Universidade de Santiago de Compostela, onde se doutorou en 1992. Foi investigador postdoctoral na Universidade de Utrecht e profesor na Universidade de Vigo (1995 – 2012). Foi ademais profesor visitante en varias universidades e centros de investigación de Xapón, Estados Unidos, Europa, Australia e Arabia. A súa investigación centrouse no crecemento controlado de nanopartículas, a súa ensamblaxe na escala nanométrica e as súas propiedades ópticas. Ademais, desenvolveu aplicacións destes materiais na área biomédica, fundamentalmente en diagnóstico e bioimaxe.

Liz- Marzán ten publicados máis de 400 artigos en revistas científicas e de divulgación, é co-inventor de 8 patentes e impartiu máis de 300 conferencias convidadas en congresos e institucións de investigación de todo o mundo. É editor da revista ACS Omega, e asesor editorial doutras publicacións. Recibiu varias distincións, como a ERC Advanced Grant, o Premio Rey Xaime I, o Premio Humboldt ou a Medalla da Real Sociedade Española de Química. Ademais, é membro da Real Academia de Ciencias e da European Academy of Sciences.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

“Con suficiente investigación, a maioría dos cancros poderanse tratar na década de 2040”

Jesús Sánchez, responsable de proxectos na Fundación CRIS, asegura que as terapias CAR-T foron unha revolución no tratamento dos tumores do sangue

O disruptores endócrinos poden aumentar o risco de cancro de endometrio

Observada unha asociación entre as mesturas de contaminantes ambientais e a maior probabilidade de desenvolver este tumor

Galicia rexistra 16.000 novos casos de cancro e 8.000 mortes cada ano

A Fundación CRIS reúnese con Sanidade para solicitar unha maior cobertura aos pacientes oncolóxicos que requiren de medicamentos CAR-T

Un equipo con participación galega desenvolve un novo tipo de axente contra o cancro

O composto actúa de maneira potente e selectiva sobre a respiración mitocondrial das células nai do tumor, diminuíndo o seu potencial canceríxeno