Antonio de Ron, novo delegado do CSIC en Galicia

O investigador da Misión Biolóxica de Galicia, onde dirixe desde 1988 o grupo de Bioloxía de Agrosistemas, substitúe a Eduardo Pardo de Guevara

Antonio de Ron, Rosa Menéndez e Eduardo Pardo de Guevara. Foto: CSIC.
Antonio de Ron, Rosa Menéndez e Eduardo Pardo de Guevara. Foto: CSIC.

A presidenta do Consello Superior de Investigacións Científicas (CSIC), Rosa Menéndez López, nomeou a Antonio De Ron Pedreira (Lugo, 1952), profesor de investigación do CSIC na Misión Biolóxica de Galicia (MBG), delegado institucional do CSIC en Galicia, relevando no cargo ao Eduardo Pardo de Guevara e Valdés, profesor de investigación do CSIC no Instituto de Estudos Galegos “Padre Sarmiento” (IEGPS), que desempeñaba o cargo desde febreiro de 2012 e que permanece como director do IEGPS.

Antonio De Ron é doutor (1987) en Bioloxía pola Universidade de Santiago de Compostela. Exerceu como catedrático de Instituto (1977-1988) e en 1988 obtivo por oposición unha praza de científico titular na MBG, promocionando sucesivamente a investigador científico (2004-2009) e profesor de investigación (2009-actualidade).
Tras un breve período como bolseiro no Instituto Nacional de Investigación e Tecnoloxía Agraria e Alimentaria (INIA), todo o seu labor investigador desenvolveuse na MBG, concretamente, no grupo de “Bioloxía de Agrosistemas”, que dirixe desde 1988.

As súas liñas de investigación versan sobre biodiversidade, xenética e mellora de cultivos, principalmente leguminosas. É responsable da colección de xermoplasma vexetal de leguminosas na MBG, autor de 66 artigos científicos en revistas de impacto e 70 libros e capítulos de libros. Participou na obtención de 12 novas liñas melloradas de xudía-gran e 16 de chícharo adaptadas ás condicións agroecolóxicas de Galicia, en sete proxectos de investigación internacionais, 26 nacionais, 11 autonómicos e 16 empresariais.

Na actualidade, Antonio de Ron é o investigador principal de “Actividades do CRF de conservación e documentación de coleccións de xermoplasma vexetal”, “Contrato de transferencia de material e licenza de explotación da variedade vexetal faba Galaica entre a Axencia Estatal CSIC e Terras dá Mariña Galega” e “Acordo de colaboración para o desenvolvemento de accións e proxectos de innovación sobre cultivos de calidade para consumo humano”.

No ámbito da divulgación científica cabe citar, entre outras actuacións, a súa implicación na Semana da Ciencia e nos concursos escolares de debuxo que desde 2011 se organizan en Pontevedra promovidos pola MBG e o Liceo Casino de Pontevedra xunto con outras entidades; así como publicacións divulgativas como “Os legumes”.

Foi profesor asociado na USC (1990-2004); profesor-titor do Centro da UNED en Pontevedra (1991-2014), delegado do Colexio Oficial de Biólogos en Galicia (1992-94), presidente da Asociación Española de Leguminosas (2006-2012) e membro do Coordinating Committee de Bean Improvement Cooperative (2001-2015). Actualmente é membro da Comisión de Títulos da Axencia para a Calidade do Sistema Universitario de Galicia (ACSUG), presidente da Sociedade de Ciencias de Galicia e líder do Protein Crops Working Group da European Association for Research on Plant Breeding.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.