Explicación: como se forman as estrelas? As imaxes da rexión de formación estelar W5, coma estas en infravermello do satélite Wide Field Infrared Survey Explorer (WISE) da NASA, proporcionan pistas claras de que as estrelas masivas preto do centro de cavidades baleiras son máis vellas cas estrelas achegadas aos bordos. Unha razón probable para isto é que as estrelas máis vellas do centro en realidade están a desencadear a formación das estrelas máis mozas dos límites. A repentina formación estelar ocorre cando o gas quente que flúe cara o exterior comprime ao gas máis frío dentro dos nós densos, abondo para que contraian gravitatoriamente en estrelas. A imaxe de infravermellos, en cores representadas cientificamente, amosa uns piares espectaculares, refugallos da evaporación lenta do gas quente que flúe, que proporcionan indicios visuais complementarios. W5 tamén é coñecido coma IC 1848 e, xunto con IC 1805, forman unha rexión complexa de formación estelar alcumada popularmente coma as nebulosas Corazón e Alma. A imaxe superior salienta unha parte de W5 que abarca uns 2.000 anos luz que é rica en piares de formación estelar. W5 atópase a uns 6.500 anos luz de distancia cara a constelación de Cassiopeia.
