Únete á nosa canle de Whatsapp
Explicación: a sonda espacial MAVEN (Mars Atmosphere and Volatile EvolutioN), lanzada o 18 de novembro de 2013, completou a súa viaxe interplanetaria o 21 de setembro, capturada nunha ampla órbita elíptica ao redor de Marte. O espectrógrafo de imaxes ultravioletas da MAVEN xa comezou a súa planificada exploración da atmosfera superior de Marte, adquirindo os datos desta imaxe desde unha altitude de 36.500 quilómetros. En cores falsas, as tres bandas de lonxitudes de onda do ultravioleta amosan a luz reflectida polos átomos de hidróxeno (en azul), o osíxeno atómico (en verde) e a superficie do planeta (en vermello). O hidróxeno atómico de baixa masa óllase nunha extensión de milleiros de quilómetros no espazo, coa nube dos máis masivos átomos de osíxeno manténdose máis achegados pola gravidade de Marte. Ámbolos dous son produtos da rotura da auga mailo dióxido de carbono da atmosfera de Marte, puidendo empregarse os datos da MAVEN para determinar a taxa de perda de auga no tempo. De feito, a MAVEN é a primeira misión adicada a explorar a tenue atmosfera superior de Marte, a ionosfera e as interaccións co Sol e o vento solar. Pero a adición máis recente aos voos das sondas espaciais procedentes do planeta Terra agora en órbita marciana é a MOM.
