Explicación: mentres ollabas (con seguridade!) o avance da eclipse parcial solar de onte, probablemente tamén miraches un grupo xigante de manchas solares. O complexo AR 2192, capturado nesta definida imaxe telescópica do 22 de outubro, é fermoso de ver, unha rexión solar activa espallada comparable en tamaño co diámetro de Xúpiter. Coma outros grupos de manchas solares máis pequenos, AR 2192 está agora a cruzar a faciana do Sol que mira á Terra e semella escura en luz visible porque é máis frío cá superficie que a arrodea. Ademais, a enerxía almacenada nos retortos eidos magnéticos da rexión é enorme e xa xerou potentes explosións, incluíndo dúas labaradas solares de tipo X esta semana. As execcións de masa coronal (CMEs) asociadas coas labaradas non afectaron ao planeta Terra, ata o de agora. A predición de máis actividade proveniente de AR 2192 aínda é significativa, mentres abala polo centro do disco solar as CMEs dirixidas cara a Terra seguen a ser posibles.
