Explicación: a eclipse de setembro do Sol está documentada nesta composición en secuencia de 68 fotogramas. Comezando ás 13:00 hora local, unha instantánea cada 4 minutos segue o progreso da Lúa nova atravesando o disco solar. A serie de exposicións, tiradas preto da liña central do estreito camiño da eclipse, remata cun dourado solpor. Os milladoiros de pedras en equilibrio do primeiro plano fan unha liña na praia da beira meridional da illa Reunión do océano Índico, preto da vila de Etang-Salé. Por suposto, o equilibrio no tamaño aparente crea a emoción nas eclipses do Sol pola Lúa tal e como se ollan desde o planeta Terra. Nunha eclipse anular, a silueta da Lúa é xusto abondo pequena para amosar o disco solar coma un estreito anel de lume no máximo da fase de eclipse.
