Marilar Aleixandre.

Marilar Aleixandre.

Marilar Aleixandre entra na Academia Galega o vindeiro 14 de xaneiro

A catedrática de Didáctica das Ciencias Experimentais foi autora dos primeiros manuais científicos en galego

A catedrática de Didáctica das Ciencias Experimentais Marilar Aleixandre ingresará na Real Academia Galega nunha sesión extraordinaria no Paraninfo da Universidade (Facultade de Xeografía e Historia) o vindeiro día 14 de xaneiro. Escritora, bióloga, profesora e investigadora, a nova académica ocupará a cadeira que quedou vacante tras o pasamento de Xosé Neira Vilas. Na sesión de recepción lerá o discurso titulado ‘Voces termando da paisaxe galega’, ao que lle dará resposta a membro de número da RAG Fina Casalderrey.

Como bióloga e experta en educación, Marilar Aleixandre foi pioneira no uso do galego como lingua vehicular no ensino das ciencias: foi coautora dos dous primeiros textos de ciencias naturais en galego (Xilbarbeira, editado polos autores e autoras en 1982, e Setestrelo, editado por Xerais en 1988); do primeiro Vocabulario das Ciencias en galego, en colaboración co Instituto da Lingua Galega (1991), e doutros materiais, itinerarios, artigos e ensaios sobre o ensino das ciencias.

Aleixandre publicou o primeiro Vocabulario das Ciencias en galego

Na actualidade, a súa liña de investigación é a argumentación, o uso de probas e o pensamento crítico no ensino das ciencias, mediante análise do discurso. Neste campo é autora dalgúns dos artigos máis citados internacionalmente sobre o tema. É, de feito, considerada unha das figuras máis relevantes da investigación en didática das ciencias en Europa.

Como escritora, a faceta pola que é coñecida popularmente, Marilar Aleixandre conta cunha frutífera traxectoria, sempre desenvolvida en galego e recoñecida tanto pola crítica (suma dezasete galardóns) como polo público lector a través de máis de corenta títulos. A súa obra foi traducida ao portugués, castelán, chinés, catalán e éuscaro, e tamén recollida en antoloxías en inglés.

En relación co seu labor docente e investigador, é integrante, entre outros, dos consellos de redacción das dúas revistas de meirande índice de impacto na didácticas das ciencias, Science Education e JRST; é membro da Sección de Ciencia, Natureza e Sociedade do Consello da Cultura Galega e é socia de Nova Escola Galega, a European Science Education Research Association (ESERA) e a National Association for Research in Science Teaching (NARST).

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.