Únete á nosa canle de Whatsapp
As empresas biotecnolóxicas galegas AMSlab (con sede en Lugo) e Nasasbiotech (A Coruña) desenvolverán, no marco dun dos primeiros proxectos asociados á Compra Pública de Innovación, Diagnóstico e Tratamento de Precisión en Enfermidades Infecciosas e Cancro, unha serie de solucións clínicas destinadas a optimizar a detección e tratamento, en concreto, de tumores de mama, colon e pulmón, tres dos máis frecuentes na poboación.
O Proxecto Biopsia Líquida no que toman parte as compañías galegas está impulsado polo Servicio Andaluz de Salud. É englóbase nunha estratexia do sistema sanitario público de Andalucía que pretende identificar necesidades asistenciais non cubertas, como servizos e produtos avanzados que aínda non están no mercado, para que a industria ofreza solucións innovadoras.
O laboratorio AMSlab, experto en control de calidade de diferentes sectores; e Nasasbiotech, especializada no desenvolvemento de solucións clínicas novas para mellorar o diagnóstico, prognóstico e tratamento do cancro, resultaron adxudicatarias a través dunha Unión Temporal de Empresas (UTE) para dar vida ao proxecto sobre a biopsia líquida. As dúas compañías son socias do Clúster Tecnolóxico Empresarial das Ciencias da Vida (Bioga).
O Proxecto Biopsia Líquida
Así, a investigación desenvolverá probas de precisión non invasivas que permitan a identificación e caracterización de biomarcadores en sangue para a personalización e monitoraxe do tratamento aos pacientes, a través dun protocolo clínico integral sobre a análise de biopsia líquida. O proxecto trata de conseguir mellorar o diagnóstico e prognóstico de pacientes e a eficacia de terapias, algo que incide na saúde da persoa afectada pola enfermidade e tamén na sustentabilidade do sistema sanitario.
En primeiro lugar, o Proxecto Biopsia Líquida traballará na obtención de kits diagnósticos que permitan a identificación e caracterización de biomarcadores en sangue (a través de células tumorales circulantes, CTCs, e vesículas extracelulares, EVs) de forma non invasiva, facendo posible un seguimento do paciente e predicir precozmente as potenciais recaidas así como a monitoraxe da resposta ao tratamento dunha forma personalizada.
En segundo lugar, a validación e establecemento de plataformas innovadoras dunha guía clínica integral adecuada sobre análise de biopsia líquida baseada nos mencionados biomarcadores sanguíneos (CTCs e EVs) que irá desde a recollida de mostra ata a decisión clínica.
Despois do proceso de investigación e innovación das empresas adxudicatarias, avanzarase en solucións innovadoras para pacientes con tumores de mama, colon e pulmón. A iniciativa, integrada no proxecto Diagnóstico e Tratamento de Precisión en Enfermidades Infecciosas e Cancro, está cofinanciada ao 80% con fondos FEDER procedentes dos Programas de Fomento da Innovación desde a Demanda en Saúde (FID-SAÚDE), que xestiona o Ministerio de Ciencia e Innovación en colaboración coas comunidades autónomas, así como con fondos propios do Servizo Andaluz de Saúde (SAS). Concretamente, este proxecto está soportado polo convenio subscrito o 4 de decembro de 2017 entre o Ministerio de Economía, Industria e Competitividade (actualmente Ministerio de Ciencia e Innovación) e o Servizo Andaluz de Saúde.
