Únete á nosa canle de Whatsapp
O Centro Oceanográfico de Vigo acolle ata o venres 7 de marzo a reunión do consello científico da Organización de Pesqueiras do Atlántico Noroeste (NAFO) que servirá para preparar a avaliación do stock de fletán negro nos bancos de Terranova.
Segundo explica Diana González, unha dos 25 expertos que participan no encontro, trátase dunha reunión preparatoria da que haberá en xuño, na que xa se avanzarán as recomendacións de xestión do caladoiro.
Os investigadores manexarán unha serie de fórmulas matemáticas e estatísticas que lles permiten predicir cal é a poboación da especie. Parten dos datos que se recollen cada ano tanto en campañas científicas como as que achegan os buques comerciais. Desde o 2011, que foi cando levou a cabo a última avaliación deste tipo, mantéñense o mesmo modelo de xestión. O sector galego aposta por un cambio.
O fletán negro é un dos principais recursos explotados pola frota de altura española na área da NAFO, que está integrada por 15 buques, a maioría de Vigo. Na actualidade a cota de capturas é de 14.800 toneladas.
