A bióloga galega Alba Aguión Tarrío, de 26 anos, alzouse co título de gañadora do concurso de monólogos científicos Famelab España 2016. Alba impúxose ao resto de participantes co monólogo “A intelixencia do formigueiro” no que explicaba o asombroso mundo da organización das formigas. A investigadora, que xa triunfara nas semifinais do certame, será a encargada de representar a España no encontro internacional que se celebrará dentro dun mes en terras británicas. Alba Aguión é colaboradora de GCiencia, con artigos na bitácora ‘Ecoloxía Azul’.
Por terceiro ano consecutivo e sen estar acompañada do seu esposo, a Raíña Letizia foi a encargada de entregar o premio. A final celebrouse nos cinemas Callao City Lights aos que dona Letizia chegou, para sorpresa de moitos viandantes, camiñando desde a rúa de Jacometrezo ata a entrada dunha das bocas de metro de Callao, onde agardaba a secretaria de Estado Investigación, Desenvolvemento e Innovación, Carmen Vela.
“Os da parte atlántica de España tamén temos graza”, recalcou a gañadora
Alba Aguión Tarrío, de 26 anos, gañouse o dereito para acudir á final deste ano, que terá lugar o próximo mes de xuño, ao lograr o recoñecemento do xurado polas súas explicacións sobre a organización e comunicación non intelixente das colonias de formigas, que a través da emisión de feromonas logran gran eficacia nos seus propósitos como comunidade.
“Se camiñas só chegarás rápido, con comunicación e compañía chegarás máis lonxe”, concluíu o seu monólogo, un dos máis aplaudidos polo público que asistiu a velada, presentada polo afamado monologuista Goyo Jiménez, que tamén obtivo un gran éxito cos comentarios cos que ilustrou a final.
En sintonía co espírito humorístico do certame, e tras recibir o premio de mans da Raíña, a bióloga, nacida na Coruña, pediu falar para aclarar que “os da parte atlántica de España tamén temos graza”.
O segundo posto conseguiuno outro monólogo moi aplaudido, a cargo do psiquiatra Daniel Antoni Orts Gonzálvez, de Elche (Alacante), que aos seus 24 anos convenceu ao auditorio e ao xurado ao explicar, vestido con bata branca, os parecidos que existen entre as patoloxías psiquiátricas e as teimas e costumes das nais na relación cotiá cos seus fillos.
O terceiro premio, concedéuselle á profesora de matemáticas Guadalupe Castellano, de 42 anos, que imparte clases en San Román de los Montes (Toledo) e tentou explicar como as matemáticas están presentes na vida cotiá e a natureza.
En conxunto foron oito os científicos monologuistas que pasaron polo escenario, todos moi aclamados e cuxas intervencións foron analizadas por un xulgado integrado polo bioquímico Didac Carmona, a meteoróloga de TVE Mónica López Moyano e o cómico Enrique Pérez Vergara «Flipy».
Famelab é un concurso internacional que pretende fomentar a divulgación científica a través de monólogos e que cultivou un gran éxito nos últimos anos, xa que desde 2007 celébrase en 25 países do mundo coa participación de máis 5.000 investigadores.