Explicación: o misterioso Voorwerp de Hanny, termo holandés para “Obxecto de Hanny”, é realmente enorme, máis ou menos do tamaño da galaxia Vía Láctea, e brilla de xeito moi potente na luz verdella producida polos átomos de osíxeno ionizado. Pénsase que se trata dunha cola de marea de material que deixou unha antiga fusión galáctica, alumeada e ionizada polo estoupido dun cuásar que habita no centro da afastada galaxia espiral IC 2497. O seu emocionante descubrimento en 2007 pola mestra holandesa Hanny van Arkel mentres estaba a participar no proxecto “en liña” Galaxy Zoo xa inspirou unha procura co descubrimento de oito pantasmais aparicións cósmicas verdes máis. Nestes paneis, fotografados polo Telescopio Espacial Hubble, aparecen as oito galaxias achegadas cos seus núcleos enerxéticos. Estes obxectos, moi afastados das súas galaxias asociadas, probablemente sexan tamén ecos de actividade de cuásar, alumeados só mentres a luz que procede do estoupido dun cuásar central chega a eles e, finalmente, vai esmorecendo deceas de milleiros de anos despois de que o propio estoupido se extinguise. Claro está que unha fusión galáctica como a inminente da nosa propia Vía Láctea e a galaxia Andrómeda, tamén podería desencadear o nacemento dun cuásar que alumearía a nosa distante versión futura do Voorwerp de Hanny.