Madagascar é un tesouro natural no medio do océano Índico. Unha das illas máis grandes do mundo, cunha superficie semellante á da Península Ibérica, que se separou de África hai 150 millóns de anos, xunto con India, que á súa vez se separou hai 65 millóns de anos. Desde entón, o seu illamento provocou que aquí se desenvolveran especies únicas no mundo. Hoxe, preto do 80% das que viven en Madagascar son endémicas da illa.
Ata alí viaxou o grupo de Divulgare, da Universidade de Vigo, para elaborar o seu novo traballo. No percorrido que realizaron durante as súas viaxes de campo por Madagascar, elaboraron o audiovisual de máis de nove minutos, no que se explica como a xeografía, a xeoloxía e a bioloxía conformaron un hábitat moi peculiar.