Únete á nosa canle de Whatsapp
Que sabemos sobre os alimentos procesados? Que nos pode ensinar a vacinación de morcegos vampiros sobre as pandemias? Se tes curiosidade, podes atopar as súas respostas en Proxector, unha páxina con 600 vídeos didácticos feitos ou subtitulados ao galego. O seu obxectivo é o de outorgar visibilidade a materiais científicos, de calidade e en lingua galega, dirixidos a docentes e alumnado universitario e de Ensino Medio. Así o expresaron o vicerreitor de Planificación, Tecnoloxías e Sustentabilidade da Universidade de Santiago de Compostela (USC), Gumersindo Feijoo, e a presidenta do Consello da Cultura Galega (CCG), Rosario Álvarez, na presentación da renovación do espazo.
O proxecto é moito máis que un redeseño visual, trátase dun cambio de concepto para ofrecerlle á comunidade universitaria e ao estudantado de secundaria recursos didácticos en galego. Rosario Álvarez fixo fincapé en que é un produto que une tres eixes de acción “ciencia e divulgación científica; un público novo e o feito lingüístico”. Ámbitos nos que tamén coincidiu Gumersindo Feijoo, quen engadiu a importancia de ser un produto audiovisual e en acceso aberto, fundamental nas institucións públicas.
Os seus comezos
Mais Proxector non é un proxecto novo. Xa iniciou a súa andaina en 2015 pero entra agora nunha nova etapa. Unha das novidades é o aloxamento dos vídeos nun repositorio creado polo CCG. A outra, a ampliación do seu público para incorporar recursos para o ensino secundario. Deste xeito, actúase nun ámbito relevante para a normalización lingüística —ESO, bacharelato e FP— ofrecendo recursos para materias que non poden darse en galego por lei.
Proxector non produce vídeos propios; funciona como repositorio de materiais xa existentes
Antropoloxía social, bioloxía, dereito, economía, comunicación audiovisual, xornalismo… son moitos os ámbitos temáticos nos que se pode buscar dentro deste repositorio que non produce vídeos propios, senón que concentra nun espazo materiais que existen noutras redes, xa filtrados e etiquetados. Ademais, ofrece especiais que agrupan materiais sobre aspectos de actualidade ou relevantes. A renovación de Proxector arrinca cun especial sobre “virus, epidemias e vacinas”.
Funcionamento de Proxector
Dende este martes os vídeos están clasificados segundo a súa temática, o idioma no que foron gravados ou subtitulados, e o nivel de ensino no que consideramos que poden ser empregados. A maiores, ofrécese unha ficha descritiva coa información básica de cada recurso. Pódese acceder aos contidos a través da busca libre e/ou os diferentes despregables que permitirán filtrar resultados. Co ánimo de apoiar a introdución do portugués no sistema educativo galego, tamén se ofrecen vídeos gravados ou subtitulados neste idioma.
