A Universidade de Santiago de Compostela encabeza o ránking de universidades públicas españolas con máis solicitudes de patentes nacionais tramitadas diante da Oficina Española de Patentes e Marcas (OEPM), segundo consta no informe ‘As universidades españolas. Unha perspectiva autonómica, 2014’, elaborado pola Fundación CYD (Coñecemento e Desenvolvemento) e no que se recollen datos do conxunto de España, por comunidades e universidades.
O citado traballo, que constitúe unha valiosa fonte de información sobre as características máis salientables do sistema universitario español por comunidades autónomas, sitúa a Galicia como a segunda comunidade autónoma máis dinámica en canto á solicitude de patentes nacionais respecto ao seu cadro de persoal docente e investigador en equivalencia a tempo completo. Asemade, a clasificación recollida no último informe elaborado pola Fundación CYD , tamén se fai eco da participación da USC noutras 243 solicitudes de patentes cursadas diante da OEPM entre os anos 2000 e 2012.
Santiago tramitou 98 das 112 patentes das universidades galegas de 2004 a 2012
A contribución da Universidade de Santiago de Compostela á situación de liderado da comunidade galega neste indicador non é menor, xa que a institución académica compostelá, líder nacional neste capítulo, tramitou 98 das 112 solicitudes de patentes PCT presentadas na Oficina España de Patentes e Marcas (OPEM), dependente do Ministerio de Educación, Cultura e Deporte (MEC), polas universidades galegas no período comprendido entre 2004 e 2012, no que o citado informe da Fundación CYD ten contabilizadas un total de 1.504 peticións por parte do conxunto da universidade pública española.
A institución académica compostelá tamén ocupa unha posición de liderado no capítulo referido ás solicitudes de patentes nacionais participadas por universidades no período 2000-2012. De feito, 243 das 497 peticións de patentes nacionais rexistradas polas universidades galegas neste tempo están participadas pola USC, unha estatística que a sitúa na cuarta posición do panorama nacional.
Santiago asina a metade dos artigos científicos das universidades galegas
A Fundación CYD tamén inclúe no último informe que vén de presentar outros indicadores que corroboran o liderado da Universidade de Santiago de Compostela no que se refire a produción científica no marco do Sistema Universitario Galego, ao que tamén pertencen as universidades de A Coruña e Vigo, e tamén no conxunto da universidade pública española. Cómpre salientar neste caso que a autoría de máis de 8.000 das 16.610 publicacións científicas acuñadas polas universidades galegas entre 2008 e 2012 corresponde á Universidade de Santiago de Compostela.
Cómpre salientar neste eido o grande impacto acadado pola USC no que atinxe á súa produción científica cuxa temática garda relación coa área das ciencias medioambientais. De feito, o último informe da Fundación CYD, que cifra en 611 as producións científicas da USC referida a este área do saber, fai especial fincapé no alto porcentaxe de excelencia da súa produción científica neste eido.
