Únete á nosa canle de Whatsapp
Científicos galegos melloran a secuenciación do virus da varíola símica (MPXV), cun protocolo novo que incrementa a súa eficiencia de maneira significativa á vez que aforra custos. Unha mellora que axudará ao coñecemento e a vixilancia epidemiolóxica da enfermidade.
Germán Bou, xefe do servizo de Microbioloxía do CHUAC, lidera o proxecto do que forman parte: Juan A. Vallejo, Angelina Cañizares, Margarita Poza, Soraya Rumbo Feal e Pablo Aja-Macaya, investigadores do Instituto de Investigación Biomédica (INIBIC) da Coruña, do CHUAC e da Universidade da Coruña (UDC) .
O traballo está publicado en medRxiv-The Preprint Server for Health Sciences-
Á hora de secuenciar o virus da varíola do mono hai unha dificultade engadida “é un virus de dobre cadea de ADN e cando o illamos mestúranse células humanas e o virus” explica Juan A. Vallejo. A nova metodoloxía permite depurar a mostra, quitar o ADN contaminado humano e secuenciar o virus, obtendo así unha metodoloxia de secuenciacion moito mais rendible e que non precisa de grandes plataformas e unha información de mellor calidade.
Estes investigadores cotexaron un enfoque de secuenciación meta-xenómica de MPXV a partir de mostras clínicas que usa unha extracción de ADN total cunha nova metodoloxía que consiste nun proceso de enriquecemento en ADN do MPXV.
Os resultados amosaron unha mellora moi significativa na eficiencia da secuenciación, aumentando o número de lecturas pertencentes ao MPXV, a profundidade de cobertura e a fiabilidade das secuencias consenso.
Ademais, con este novo método afórranse recursos xa que podes incluír máis mostras en cada carreria de secuenciación, o que reduce os custos e o tempo de diagnose que poden ser factores moi importantes cando se trata dunha enfermidade contaxiosa.
“É un virus de dobre cadea de ADN e cando o illamos mestúranse células humanas e o virus”
JUAN A. VALLEJO. Investigador do INIBIC
A varíola do mono é unha enfermidade zoonótica que se orixinou nas selvas de África central e occidental e da que se informou por vez primeira na República Democrática do Congo. Corría o ano 1970. Os animais eran o principal roteiro de transmisión: por mordedura ou rabuñada, preparación de carne de animais silvestres, contacto directo con fluídos corporais ou lesións dun animal infectado ou material contaminado. Algo cambiou, e os brotes de 2022 en diferentes países e continentes mostraron que a principal vía de transmisión era de persoa a persoa.
Virus estable
Con todo, ao contrario do que ocorre co SARS- CoV ou a gripe que son virus de ARN e mutan con gran facilidade, o da varíola símica o “é un virus de ADN de dobre cadea envolta, moito máis estable e menos contaxioso”, subliña Juan A. Vallejo.
Liñaxe, rastrexabilidade, grao de estabilidade… son informacións básicas no combate contra a propagación do virus. En España xa son máis de 4.577 as persoas contaxiadas, 42 delas en Galicia. (datos da Rede Nacional de Vixilancia Epidemiolóxica- Renave, a 3 de agosto).
Mellorar a secuenciación do virus é unha porta aberta para profundar no coñecemento da variante que está en circulación, estudar posibles cambios no virus, perfeccionar vacinas ou atopar novas solucións terapéuticas.
Referencia: A new and efficient enrichment method for metagenomic sequencing of monkeypox virus (Publicado en medRxiv- The Preprint Server for Health Sciences)
