A aplicación das novas tecnoloxías para obter información sobre o sector forestal e outras actividades do campo galego é o principal obxectivo da start-up lucense 3eData, que naceu no ano 2016 pola iniciativa de tres enxeñeiros de montes do Instituto de Biodiversidade Agraria e Desenvolvemento Rural (IBADER). Nos últimos anos non deixou de avanzar na exploración de novas posibilidades para desenvolver ferramentas que axuden a extraer información do territorio.
Marco Rubinos, un dos socios fundadores da empresa, explica que o proxecto naceu coa idea de ofrecer un servizo baseado nas investigacións que os seus promotores desenvolveran na universidade. “Partiamos dunha serie de tecnoloxías que contaban con elementos innovadores e, ademais, a aparición dos drons supuxo un pulo ao tratarse dunha ferramenta máis próxima ao terreo que facilitaba a posibilidade de ter un mellor servizo”, indica Rubinos.
3eData nace en 2016 como spin-off da Universidade de Santiago (USC) e o seu carácter innovador mantense ata hoxe en día, aínda que o tipo de servizos ofrecidos vai mudando. Na actualidade a empresa atópase nunha fase de desenvolvementos específicos no marco de proxectos europeos. No sector forestal crearon unha ferramenta para tratar os datos e convertelos en información co fin, por exemplo, de facer unha valoración do volume de existencias de madeira no monte.
Proxectos europeos
Actualmente a start-up lucense está a comercializar este tipo de servizos e outros que tamén se desenvolveron dentro de proxectos europeos e que teñen relación coa biodiversidade, coa calidade das augas e outros aspectos vinculados ao territorio. O sector agroforestal é o seu principal campo de actuación xa que hai moitas necesidades que atender neste terreo e os seus proxectos abranguen desde infraestruturas eléctricas ata os servizos de topografía e telemetría, pasando polo sector hidro-biolóxico o forestal e a gandería.
Os traballos realizados por 3eData comezan coa atención persoal aos clientes, xa que é fundamental establecer unha canle de comunicación permanente para comprender todas os aspectos da problemática a resolver e atender todas as necesidades durante o desenvolvemento do proxecto. A empresa mantén unha conexión directa cos centros de investigación para analizar as necesidades dos clientes coa última información científica dispoñible.
Rubinos apunta que o sector público é o que representa o maior volume de facturación aínda que non perden de vista aos clientes privados e, por exemplo, comezaron a comercializar o servizo de valoración de activos forestais aos rematantes de madeira.
Nos seis proxectos europeos nos que participan na actualidade contan con socios de distintos países e tamén con clientes internacionais que traballan en España. En todo caso no que atinxe á parte de enxeñería o seu traballo concéntrase no noroeste ibérico, xa que é o territorio ao que está adaptado o seu modelo.
“A xestión de proxectos europeos e a elaboración de modelos de desenvolvemento forman parte do ADN da empresa pero queremos ampliar sectores e vender máis servizos ás empresas privadas, especialmente do sector forestal”, sinala Rubinos, quen destaca tamén os apoios familiares e institucionais cos que contaron para o desenvolvemento da empresa, especialmente os da aceleradora Vía Galicia e os do Igape e a Axencia Galega de Innovación (Gain) da Xunta de Galicia. 3edata tamén colabora co Polo Aeroespacial de Rozas para desenvolver ferramentas de análise do territorio.
