Antonio Figueras, novo director do Instituto de Investigacións Mariñas do CSIC

O Consello Superior de Investigacións Científicas (CSIC) nomeou a Antonio Figueras Huerta, profesor de investigación do CSIC e membro do grupo Inmunoloxía e Genómica, director do Instituto de Investigacións Mariñas ((IIM, Vigo).

Antonio Figueras.
Antonio Figueras.

Van acompañalo na dirección Ángel Francisco González González, investigador científico do CSIC e xefe do Grupo ECOBIOMAR, e Sonia Dios Vidal, científica do CSIC e membro do grupo Inmunoloxía e Genómica, como vicedirectores.
Antonio Figueras Huerta (Vigo, 1957) é licenciado en Bioloxía pola Universidade de Santiago de Compostela (1979) e doutor en Bioloxía pola citada universidade (1984). Científico do CSIC dende 1987, na actualidade é profesor de investigación.
Desenvolve o seu traballo no grupo de investigación “Inmunoloxía e Genómica do IIM“, que ten por obxectivos incrementar o coñecemento sobre a transcriptoma e proteómica da resposta inmune de peixes e moluscos fronte a patóxenos, identificar xenes que se poidan empregar como marcadores en procesos de selección xenética e mellorar a resposta inmune mediante o uso de inmunoestimulantes e vacinas. Dirixe tamén o Laboratorio Nacional de Referencia de Enfermidades de Moluscos Bivalvos. É autor de máis de 200 artigos científicos en revistas de impacto, 34 libros e capítulos de libros. Dirixiu 20 teses doutorais. Foi o coordinador do proxecto Consolider “Aquagenomics“, financiado con seis millóns de euros e no que participaron 18 grupos de investigación. Na actualidade é o investigador principal, entre outros proxectos, de “Mellora da produción en acuicultura mediante ferramentas de biotecnoloxía” e “Secuenciación do xenoma do mexillón galego”.

Figueras foi xa director do IIM e vicepresidente de Investigación do CSIC

No campo da cultura científica, é autor do blog “Ciencia Mariña e outros asuntos“, premio de comunicación científica na categoría de blogs. É tamén colaborador habitual de GCiencia, onde publica artigos de análise e divulgación, ao tempo que partipou na fundación do noso medio de comunicación e asesora en contidos científicos de toda índole.
En canto á súa experiencia no campo da xestión, foi director do propio IIM (2001-2005) e vicepresidente de Investigación Científica e Técnica (VICYT) do CSIC (2012-2014).
“Os cinco grandes obxectivos cos que afronto esta etapa son fortalecer a estrutura do IIM mediante unha renovación da organización interna e unha adecuación dos protocolos de funcionamento; manter e mellorar o seu nivel de produción científica e calidade na investigación para responder aos retos sociais; incrementar a aposta polo compromiso público-privado para contribuír ao liderado industrial; impulsar sinerxías e alianzas con outras institucións nacionais e internacionais e promover a cultura científica e tecnolóxica”, avanza Antonio Figueras Huerta.

Publicidade

Premiado como divulgador científico, Figueras é colaborador destacado de GCiencia

CSIC é a maior e máis importante institución pública dedicada á investigación en España e a terceira de Europa. Adscrita ao Ministerio de Economía e Competitividade, o seu obxectivo é desenvolver e promover investigacións en beneficio do progreso científico e tecnolóxico.
En Galicia, o CSIC conta cunha Delegación Institucional en Santiago de Compostela e cinco centros de investigación (Misión Biolóxica de Galicia, Instituto de Estudos Galegos “Padre Sarmiento”, Instituto de Investigacións Mariñas, Instituto de Investigacións Agrobiolóxicas de Galicia, Instituto de Ciencias de Patrimonio), e está presente noutras iniciativas e entidades.
O IIM é un centro propio do CSIC creado en 1951 como laboratorio costeiro dependente do Instituto de Investigacións Pesqueiras de Barcelona, do que se desvincula en 1978. Adopta a súa denominación actual en 1986. Antes de situarse na súa sede actual, en Bouzas, onde está dende 1973, estivo no antigo Colexio Alemán (1951-1960) e na avenida de Beiramar (1961-1973).
O centro estrutúrase en torno a catro departamentos: Oceanografía, Recursos e Ecoloxía Mariña, Biotecnoloxía e Acuicultura e Tecnoloxía de Alimentos.

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

Descuberta unha salina romana no xacemento do Aguncheiro de Oia

Os arqueólogos escavan unha primeira área de 100 m2 de pavimentos e estruturas cuxa extensión estimada podería alcanzar os 4.000 m2

Dentro do ‘Odón de Buen’, o buque ‘vigués’ que navega cara á nova campaña científica na Antártida

O oceanográfico construído en Galicia participará por primeira vez nas operacións de apertura das bases españolas do polo sur

Do 100% ao 36% nun trienio: a “preocupante” evolución da seca nos encoros galegos

A serie histórica de Eiras vai en liña coa situación de Cecebre, que marca o seu mínimo dos últimos 15 anos tras reducir case á metade as súas reservas

Cidades nas que vivir

Un estudo analiza os patróns de xentrificación en Vigo, Santiago e A Coruña