Únete á nosa canle de Whatsapp
Aínda que cómpre agardar unha ou dúas semanas, por se xorde un repunte de casos, parece que a intensidade da gripe en Galicia comeza a descender. Acadouse o cumio na primeira semana do ano, cunha incidencia menor que outras tempadas, segundo o criterio que emprega o Servizo Galego de Saúde: o número de chamadas semanais realizadas ao 061 polo virus da gripe e outras infeccións respiratorias agudas (IRA). Con todo, xa houbo que lamentar 38 persoas falecidas por causas directamente relacionadas co virus, segundo os datos aportados polo Sergas. E 18 delas non tiñan posta a vacina da gripe.
Ata os últimos datos, o 68% dos ingresados tiñan gripe B
E aínda que non estamos falando dunha epidemia significativa, si está sendo unha campaña particular por varias razóns. “En xeral, os virus A son os máis frecuentes, e circulan en moitas ocasións conxuntamente cos virus B, pero hai anos nos que son estes últimos os virus os máis frecuentes”, sinala Juan Gestal, profesor emérito de Medicina Preventiva e Saúde Pública na USC. Estes virus B circulan exclusivamente entre humanos, ao contrario que o A, que tamén circula en animais, e que adoita producir cadros clínicos máis graves.
“A data de 14 de xaneiro – sinala Gestal – o 68% dos pacientes ingresados eran por virus B; 24% por virus A e B, e o resto por virus A. Non é habitual”, apunta o experto.
Estes virus circulantes varían dun ano a outro. Pero este ano produciuse outro feito diferencial: “Unha parte destes virus B, preto da metade, son da liñaxe Yamagata, e non estaban incluídos a vacina trivalente (si na tetravalente) utilizada para esta tempada no hemisferio norte”. A trivalente incluía tres cepas de virus da gripe: dúas A (H1N1 e H3N2), e unha B (liñaxe Victoria); mentres que a tetravalente levaba catro cepas: as tres anteriores e además outra B (liñaxe Yamagata).Así, Juan Gestal conclúe: “A protección da vacina da gripe este ano é moito menor”.
Isto non supón, claro está, un motivo para desconfiar da efectividade da inmunización. “Non se entende que as persoas con risco de sufrir unha gripe complicada non poñan a vacina da gripe, que practicamente non ten efectos secundarios, e que cando acerta cos virus circulantes, protexe nunha elevada porcentaxe”, conclúe Gestal.
Tamén podes ler:
saude/xente-vacina-gripe/
