Únete á nosa canle de Whatsapp
É todo un tópico ao comezo de cada outono. Desde a Administración autonómica, a través do Servizo Galego de Saúde, e por medio dos profesionais sanitarios, ponse en marcha unha prolongada campaña de vacinación contra o virus da gripe que dura ata o final de ano. A inmunización é clave para evitar as complicacións da doenza, que adoita acadar o seu pico de incidencia na xente nos meses de decembro e xaneiro.
Aínda co alcance desta campaña, e coa resposta positiva da xente e a poboación en xeral, hai que lamentar de novo decenas de vítimas mortais a causa da gripe. Ata o momento, segundo os datos do Sergas, faleceron 38 persoas por causas relacionadas directamente coa doenza. E delas, 18 non estaban vacinadas, aínda que todas tiñan indicada a vacina por motivos de idade ou por factores de risco.
Recoméndase a vacinación de todos os maiores de 64 anos, pero só o 58% se inmunizan
Todos os anos, o Sergas márcase como obxectivo conseguir a vacinación do 65% dos maiores de 64 anos. Os datos provisionais desta campaña sinalan que ‘só’ un 57,97% destas persoas (383.355 galegos) se inmunizaron.
Desde o propio Sergas, citando a bibliografía sobre a materia, aluden a tres principais causas á hora de sinalar esta baixa porcentaxe de vacinación entre a xente: non considerar probable contraer a gripe, non percibir a gripe coma un risco para a saúde e o medo aos efectos secundarios da vacina; un aspecto a veces magnificado polos movementos antivacinas. A este respecto, os efectos adversos son moi pouco frecuentes; case sempre se corresponde cunha pequena dor local no lugar no que se administrou a inxección.
Neste sentido, Juan Gestal sinala que “non se entende” esta baixa porcentaxe de inmunización, “con todo o esforzo que se está a facer por parte das autoridades sanitarias”, incluso chamando persoalmente “ao domicilio ás persoas que por razón de idade teñen recomendada a vacina”.
Tamén podes ler:
saude/yamagata-vacina-da-gripe/
