O maior cerebro de Galicia quere ser aínda máis grande. Seis anos despois da súa inauguración, o Súpercomputador “Finisterrae”, do Centro de Supercomputación de Galicia (CESGA), será actualizado en 2014 para volver á elite europea da capacidade de cálculo.
Na súa estrea en 2007, o “Finisterrae” estivo no Top 100 dos grandes ordenadores do mundo. E aínda hoxe en día é unha máquina de alto nivel, que utilizan cada día unha media de 500 investigadores.
O “Finisterrae” axudou a descifrar o xenoma, executa os complicados modelos de predición do tempo para Meteogalicia e foi parte dos cálculos para descubrir o bosón de Higgs.
O director do CESGA, Javier García Tobío, anúncianos en entrevista para GCiencia a actualización do “Finisterrae” e fálanos dun centro de computación, situado en Santiago, que se mantén en vangarda mundial.
