A aceleradora BFAero enmárcase na estratexia da Xunta para impulsar o sector dos vehículos aéreos non tripulados para uso civil.
A aceleradora BFAero enmárcase na estratexia da Xunta para impulsar o sector dos vehículos aéreos non tripulados para uso civil.

A aceleradora aeroespacial BFAero impulsa tres proxectos galegos

As empresas Lupeon, Aeromedia e RadioUAV participarán na primeira edición, que se enmarca na Civil UAVs Initiative da Xunta

Despois do anuncio, o pasado venres 5, dos dezaseis proxectos preseleccionados na primeira edición da aceleradora BFAero, especializada no sector aeroespacial e impulsada pola Xunta, a través da Consellería de Economía, Emprego e Industria, o ente autonómico fixo pública a través da directora da Axencia Galega de Innovación (Gain), Patricia Argerey, a decisión sobre os seis proxectos seleccionados para participar na iniciativa. O 50% delas (Lupeon, Aeromedia e RadioUAV) son galegas, mentres que as tres restantes teñen a súa orixe en Madrid e a Comunitat Valenciana.

Os promotores defenderon as súas candidaturas mediante unha entrevista persoal e unha presentación ante o comité executivo, despois do cal se anunciou a elección. Patricia Argerey destacou a gran concorrencia de proxectos -recibíronse un total de 54 solicitudes– e a alta calidade dos mesmos e animou ás iniciativas que non resultaron seleccionadas hoxe a madurar as súas ideas e intentalo en vindeiras edicións desta acelereradora, que ten previsto dúas convocatorias máis ata acoller 19 proxectos en total.

A directora de Gain lembrou que o obxectivo desta aceleradora é crear e acelerar compañías innovadoras na cadea de valor do sector aeroespacial en Galicia, capaces de captar, atraer e reter talento en Galicia e subliñou que, precisamente, o talento é un factor clave para posicionar Galicia como un referente a nivel internacional en innovación no sector aeroespacial. A directora de Gain felicitou aos seleccionados, animounos a aproveitar as oportunidades que lles ofrece este programa de aceleración e incubación e agradeceu ás entidades e empresas colaboradoras a súa implicación nesta iniciativa (as empresas Indra e Babcock, o centro tecnolóxico da automoción CTAG, a Fundación CEL, diferentes colaboradores representados polo Consorcio Aeronáutico Galego e os organismos dependentes da Xunta de Galicia, Igape, Gain e XesGalicia).

Os proxectos galegos seleccionados

  • Lupeon (Ordes): a empresa ordense, especializada en impresión 3D, traballará na modalidade de aceleración do “deseño e optimización topolóxica de pezas estruturais de UAVs así como a fabricación aditiva de ditas pezas en composites plásticos ou metálicos co fin de reducir o peso dos UAVs e así conseguir maior autonomía de voo”.
  • Aeromedia (Oleiros): na modalidade de incubación, este proxecto traballará con vehículos aéreos non tripulados “para realizar fotografías das tres palas dun eólico polo anverso e reverso, sen necesidade de parada”, o que supón maior rapidez na toma de datos e aforro, xa que non se para a produción.
  • RadioUAV: o proxecto ligado ao attlanTTic da Universidade de Vigo traballará no desenvolvemento de sistemas para tarefas de inspección non destrutiva, detección e identificación con sensórica activa e pasiva.

Alén destas iniciativas, tamén foron escollidas tres empresas de Madrid e a Comunitat Valenciana con proxectos para novas baterías para UAVS, novas aeronaves de baixo custo e helicópteros non tripulados para uso civil.

Todos estes proxectos comezarán en maio os programas de incubación e aceleración, nos que terán acceso, ademais de financiamento, a espazos de traballo compartidos, plans de formación adaptados ás súas necesidades, acompañamento de mentores escollidos entre profesionais do sector aeronáutico e dos vehículos non tripulados, oficinas individuais equipadas, aulas de formación e servizos de asesoramento técnico que pon á súa disposición a Fundación CEL, posibilidade de uso das instalacións do aeródromo de Rozas, onde os elixidos poderán utilizar os drons de Indra e Babcock (Targus e LUA) e outros equipamentos especializados do ámbito da Civil UAVs Initiative.

En canto ao apoio económico, a Xunta de Galicia ofrece un financiamento a fondo perdido de ata 100.000 euros na fase de incubación e de 50.000 en aceleración. Paralelamente, poderán optar a un financiamento en forma de préstamos de Indraventures de entre 50.000 e 500.000 euros en incubación e sen límite en aceleración. Tamén en aceleración terán acceso a préstamos participativos de ata 250.000 euros de XesGalicia.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.