O xaxún intermitente sinalouse como positivo para a saúde. Segundo varios estudos, pode beneficiar as persoas en risco de diabetes e aumenta a esperanza de vida en invertebrados. Con todo, algunhas investigacións limitan a súa eficacia á hora de perder peso, comparado coas dietas tradicións.
Do que apenas hai información é sobre como os animais que fan xaxún manexan os recursos e como estas decisións afectan ás supostas compensacións entre o crecemento, a reprodución e a calidade dos gametos. Estas compensacións causadas polo xaxún acháronse en invertebrados, pero faltan datos sobre vertebrados.
Un novo estudo, liderado pola Universidade de Anglia Oriental de Reino Unido (UEA), demostra que a alimentación con tempo restrinxido nas femias de peixe cebra (Danio rerio) deteriora a calidade dos óvulos. Así mesmo, os machos tamén mostraron unha redución da velocidade espermática con esta práctica.
Os investigadores recomendan unha avaliación coidadosa dos efectos do xaxún intermitente sobre a fecundación
Alexei Maklakov, coautor do traballo na UEA, explica: “O xaxún restrinxido no tempo é unha pauta de alimentación que limita o consumo de alimentos a determinadas horas do día. É unha tendencia moi popular no ámbito da saúde e a forma física, e a xente practícao para perder peso e mellorar a súa saúde”. “Queriamos pescudar máis sobre como este tipo de dietas poden afectar á fertilidade nun organismo modelo”, engade.
Para iso mediron como machos e femias asignan recursos ao sustento do seu corpo fronte á produción e mantemento de esperma e óvulos, e a calidade da súa descendencia.
Os resultados do novo estudo recalcan a necesidade de ter en conta o impacto sobre a reprodución e recomendan unha avaliación coidadosa dos efectos do xaxún intermitente sobre a fecundación.
Un efecto que se mantén no tempo
Outro dos achados significativos deste traballo é que os efectos negativos sobre a calidade dos óvulos e o esperma continúan cando estes animais volven a niveis normais de consumo de alimento.
O equipo de investigadores afirma que, aínda que o estudo se realizou en peixes, as súas conclusións poñen de relevo a importancia de considerar non só o efecto do xaxún no peso e a saúde senón tamén na fertilidade que presentan este tipo de dietas.
Necesítase máis investigación para entender canto tempo tarda o esperma e a calidade dos óvulos en volver á normalidade despois do período de xaxún
Edward Ivimey-Cook, da Facultade de Ciencias Biolóxicas da UEA, sinala: “O que descubrimos é que o xaxún restrinxido no tempo afecta á reprodución de forma diferente en machos e femias. Unha vez que os peixes volveron ao seu horario normal de alimentación, as femias aumentaron o número de crías que producían á conta da calidade dos ovos, o que se traduciu nunha redución da calidade da descendencia”.
“Necesítase máis investigación para entender canto tempo tarda o esperma e a calidade dos óvulos en volver á normalidade despois do período de xaxún”, conclúen.
Referencia: Fasting increases investment in soma upon refeeding at the cost of gamete quality in zebrafish (Publicado en Proceedings of the Royal Society)
