Malia que estacionalidade non está completamente establecida para o SARS-COV-2, a experiencia dos últimos dous anos apunta a que coa chegada do inverno haberá un pico significativo de casos, do mesmo xeito que ocorre con outros virus respiratorios. Atendendo ás recomendacións da European Medicines Agency (EMA) e do Ministerio de Sanidade, Galicia prepárase para pór en marcha unha nova campaña de vacinación extensiva que, de entrada terá, como poboación-diana ás persoas de máis de 80 anos, aos usuarios de residencias de maiores e ao persoal sanitario e socio-sanitario.
Non será ata finais de setembro ou principios de outubro cando se inicie a vacinación, segundo as previsións que baralla o Goberno. Para entón, España disporá das novas vacinas autorizadas pola EMA o pasado 1 de setembro, que xeran unha maior resposta inmune fronte á variante ómicron BA.1. do virus SARS-CoV-2.
Trátase das novas vacinas das compañías Pfizer-BioNTech (Spikevax Bivalent Orginal/Omicron BA.1) e Moderna (Cominarty Orixinal/Omicron BA.1), que utilizadas como dose de recordo poden ofrecer unha protección máis ampla fronte ás posibles mutacións do virus.
As vacinas que hai e as que están por chegar
Con estas dúas novas fórmulas, son xa oito as vacinas autorizadas pola EMA para o seu uso na Unión Europea. Son as seguintes:
- Comirnaty de Pfizer-BioNTech. Vacina de ARNm de tozinamerán / Covid-19 (nucleósido modificado). E Comirnaty Original/Omicrom BA.1
- Spikevax de Moderna. Vacina de ARNm de elastomerano / covid -19 (modificada con nucleósidos). E Spikevax Original Omicrom BA.1
- Vacina Covid-19 Valneva de Valneva. Vacina covid-19 (inactivada, adyuvada)
- Nuvaxovid de Novavax. Vacuna covid-19 (recombinante, adyuvada)
- Vaxzevria de AstraZeneca. Vacuna covid-19 (ChAdOx1-S recombinante)
- Jcovden de Jansen. Vacuna covid-19 (Ad26.COV2-S recombinante)
A esta listaxe hai que engadir outras dúas vacinas que contan co aval da EMA e que presentaron senllas solicitudes de comercialización:
- Vidprevtyn de Sanofi Pasteur
- Skycovion de SK Chemicals GmbH,
Ademais existen outras tres fórmulas que están en fase “revisión continua” da EMA e que, a medio prazo, poderían incorporarse á oferta de vacinas capaces de enfrontar ás posibles variantes do virus. É o caso da:
- Vacina Covid-19 HIPRA (PHH.1V) de HIPRA Human Health SLU
- Sputnik V, Gam-Covid-Vac do Instituto Gamaleya
- Vacina Covid-19 (Vero Cell) Inactivada de Sinovac
Hai postas moitas esperanzas na vacina desenvolvida pola farmacéutica española HIPRA que ten demostrado unha boa resposta de anticorpos neutralizantes fronte ás sub-variantes de ómicron BA.2 e BA.4 e BA.5. A empresa ten listas 250 millóns de doses para a súa distribución no momento que reciba a autorización da EMA para a súa comercialización.
O virus segue entre nós
Afastada do foco mediático, a covid segue presente entre nós. Galicia conta con 1.569 casos activos de coronavirus: 2 están na UCI, 114 en unidades de hospitalización e 1.453 no seu domicilio, segundo datos da Consellería de Sanidade (a 3 de setembro).
Porén a nosa comunidade enfrontará un posible pico ou onda epidémica da covid cun 92,2% da poboación vacinada con cando menos unha dose (2.482.992 galegos e galegas, en termos absolutos); un 91,3% coa pauta completa administrada (2.457.827 persoas) e cun 74,2% da poboación – os sectores máis vulnerables- cunha dose de recordo posta (1.998.982). Son cifras que explican a contención da expansión da enfermidade, a minoración da gravidade da doenza e a confianza da sociedade na ciencia.
Sen dúbida avanzamos na loita contra esta pandemia pero como sinala a inmunóloga e catedrática da Universidade de Vigo, África González: “Á única certeza do coronavirus é que chegou para quedar con nós”.
