Xoves 23 Maio 2024

UVigo e Sergas crean un método máis rápido de diagnose do cancro de pulmón

A diagnose precoz do cancro é unha das principais claves para mellorar as posibilidades de supervivencia dos pacientes. Reducir o tempo de espera dende a sospeita clínica ata a confirmación e inicio do tratamento médico é unha das principais liñas de traballo dos científicos, que pouco a pouco van acadando avances nesta liña. Exemplo disto é o desenvolvemento dun panel de biomarcadores para a detección de pacientes con sospeita clínica de cancro de pulmón. Este nova técnica é froito da tese de doutoramento de Sonia Blanco, dirixida polos profesores María Páez de la Cadena Tortosa e Francisco Javier Rodríguez Berrocal.

Sonia Blanco, cos seus directores de tese.
Sonia Blanco, cos seus directores de tese.

A investigadora desenvolveu este proxecto en colaboración coa Unidade de Diagnose Rápida de Cancro de Pulmón do Servizo de Neumoloxía do Chuvi. Explica que esta patoloxía é responsable do 20% das mortes por cancro, polo que esta unidade médica trata de “definir a poboación idónea, entre aqueles individuos con sospeita de cancro pulmonar, que deberían entrar na vía rápida e someterse ás probas diagnósticas específicas sen demora”. Neste contexto, Sonia Blanco centrouse en obter un panel de marcadores séricos e en desenvolver un modelo de clasificación de cancro de pulmón para “poder predicir a presenza desta patoloxía en pacientes con sospeita clínica”.

Publicidade

A investigadora explica que o panel e o algoritmo ofrecen unha eficiencia diagnóstica “que mellora a doutros estudos deste tipo, e incluso a dos test que se ofertan de modo comercial, sendo a súa aplicación sinxela e de baixo custe”. O panel de biomarcadores presenta unha sensibilidade do 95% e unha especificidade do 65%, o que significa segundo Blanco, “que o 95% dos casos de cancro examinados son clasificados correctamente co noso algoritmo”. A científica engade que dentro dos pacientes con enfermidade en estadio temperá I, tamén o 95% son ben asignados ao grupo de cancro. Por outro lado, aproximadamente o 80% de individuos sans serían ben clasificados con este modelo, mentres que para o grupo de individuos control con algunha patoloxía benigna de pulmón esta cifra diminúe ao 53%. Para a investigadora os resultados son “claramente optimistas” pero recoñece que requiren dunha validación con pacientes doutros hospitais, “que corrobore a relevancia do noso panel de marcadores e o seu algoritmo de detección”.

O Servizo de Neumoloxía do CHUVI colaborou no estudo coa Universidade de Vigo

Os científicos tamén subliñan que a aplicación deste panel de marcadores á poboación que é atendida nun servizo de Neumoloxía permitirá predicir de forma rápida e non invasiva a presenza de cancro de pulmón en pacientes con sospeita desta patoloxía, complementando así as ferramentas diagnósticas en uso, e evitando en moitos casos procedementos invasivos.

Para ao deseño do panel de marcadores, os investigadores avaliaron 11 proteínas, que comprenden un rango de funcións determinantes na bioloxía tumoral, como a proliferación, a anxioxénese, invasión e metástase, e a inflamación. Algunhas destas proteínas, como destaca Blanco, son de uso habitual na rutina clínica e outras xa foran investigadas con anterioridade no grupo de investigación Biomarcadores Moleculares. Análises estatísticas multivariantes permitiron determinar finalmente a combinación de marcadores que presentaba unha maior eficiencia na diagnose de enfermos con cancro de pulmón, é dicir, “que teña unha alta sensibilidade para distinguir aos enfermos con maior sospeita de cancro”, co obxectivo de realizar probas máis específicas coa maior celeridade posible. Deste xeito, o panel deseñado polo equipo vigués está composto polos marcadores EGF, sCD26, Calprotectina e CEA e, tal como puntualiza Sonia Blanco, mediante a aplicación de modelos de regresión, obtívose o algoritmo de clasificación correspondente, fixando ademais un punto de corte.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Unha vacina de ARNm reprograma o sistema inmune para atacar o cancro cerebral máis letal

O avance dun grupo de investigadores da Universidade de Florida probarase nun ensaio clínico pediátrico contra o glioblastoma

Os casos de cancro de próstata duplicaranse en 2040

Un informe publicado na revista 'The Lancet' estima que en menos de dúas décadas haberá 2,9 millóns de pacientes con este tumor

“Con suficiente investigación, a maioría dos cancros poderanse tratar na década de 2040”

Jesús Sánchez, responsable de proxectos na Fundación CRIS, asegura que as terapias CAR-T foron unha revolución no tratamento dos tumores do sangue

O disruptores endócrinos poden aumentar o risco de cancro de endometrio

Observada unha asociación entre as mesturas de contaminantes ambientais e a maior probabilidade de desenvolver este tumor