AstraZeneca e o Instituto Jenner da Universidade de Oxford pausaron este martes a fase 3 das probas da súa vacina contra o Covid-19, logo de atopar “posibles reaccións adversas” nun participante do estudo no Reino Unido. Trátase dun único caso entre milleiros de probas, que vai ser sometido a unha rigorosa análise, o que fala dos altos niveis de control desta fase da vacina.
“Como parte das probas aleatorias e controladas da vacina contra o coronavirus da Universidade de Oxford a nivel global, o noso proceso de revisión estandar decidiu unha pausa na vacinación para permitir a revisión da información” do paciente, indicou o laboratorio sueco-británico nun comunicado.
O consorcio investigador engadiu: “Esta é unha acción de rutina que ten que suceder cando, durante o desenvolvemento das probas, ten lugar unha enfermidade que potencialmente non teña explicación. A decisión asegura que se manteña a integridade das probas. Durante o transcurso de probas de grande envergadura atoparemos enfermidades aleatorias, pero estas deben ser revisadas de xeito independente. Estamos a traballar para acelerar a revisión deste único evento para minimizar calquera potencial impacto nos obxectivos temporais da proba. Estamos comprometidos coa seguridade dos nosos participantes e mantemos os máis altos estándares nas nosas probas”.
O laboratorio non precisou cales foron os síntomas desenvolvidos pola persoa que levou a paralizar o proceso, pero o portal especializado Stat News describiu sospeitas dunha “seria reacción adversa”. Con todo, unha fonte indicou ao medio que se espera que a persoa se recupere. O laboratorio tampouco especificou cal será o lapso de tempo da paralización do estudo.
En agosto, a UE pechou un acordo coa farmacéutica para asegurar a compra de 300 millóns de doses da vacina. Bruxelas calculaba hai días que a vacina podería chegar ao mercado este mesmo mes de novembro.
AstraZeneca e a Universidade de Oxford uniron as súas forzas na primavera para desenvolver e distribuír a futura vacina contra o Covid-19. En abril realizaron de forma simultánea os ensaios das Fases 1e 2 no sur de Inglaterra e desde finais de xullo a vacina -cuxo nome experimental é AZD1222- atópase na súa última fase de desenvolvemento, que prevé ensaios en 50.000 voluntarios. Tras a conclusión, a farmacéutica prevé fabricar tres mil millóns de doses e asinou acordos con numerosos países de todos os continentes
Muy bueno.Esclarece el comportamie nto de la investigación.