O equipo do profesor Eduardo Fernández Megía traballará na química do proxecto Endoscape. Foto: Andrés Ruiz / CiQUS

O CiQUS entra nun proxecto europeo para novas terapias xénicas

A terapia xénica é na actualidade unha das ferramentas máis prometedoras no ámbito da nanotecnoloxía aplicada á medicina. A comunidade investigadora traballa no seu desenvolvemento para obter un sistema seguro que permita transportar ácidos nucleicos ao interior de células situadas en órganos específicos, co obxectivo de propiciar un efecto curativo ou substituír un orixinal danado.

Nesta estratexia, un dos elementos chave son os ‘nanotransportadores’, unha sorte de ‘ vehículos’ a escala nanométrica capaces de recoñecer as células diana e internalizar o material xenético. Dende un punto de vista terapéutico, ata hoxe só transportadores obtidos a partir de virus modificados foron quen de acadar este obxectivo. Malia todo, os riscos de seguridade sanitaria asociados á opción viral, así como os seus custosos procesos de fabricación, seguen supoñendo un considerable obstáculo para o desenvolvemento desta tecnoloxía e, consecuentemente, un menoscabo para a súa aplicación no tratamento de enfermidades con grandes grupos de pacientes.

‘Endoscape’, unha vía de orixe natural
Na procura de novas abordaxes neste eido xorde a nova plataforma tecnolóxica europea ENDOSCAPE, na que participa o grupo da USC Fernández-Megía Lab, dirixido polo profesorEduardo Fernández Megía, xunto a outros oito grupos de investigación europeos e dúas empresas. A iniciativa, liderada por  A Charité-Universitätsmedizin de Berlín, propón unha nova estratexia baseada no uso de compostos naturais extraídos de plantas, dos que se sabe que facilitan o transporte de macromoléculas ao citoplasma das células e cuxa actividade xa foi demostrada en estudos preliminares in vivo.

O proxecto está financiado con preto de 7 millóns de euros a través do programa Horizonte 2020 da Comisión Europea para explorar durante os próximos catro anos unha proba de concepto desta tecnoloxía, co propósito de que poida ser aplicada nun amplo rango de enfermidades. No que respecta á parte desenvolvida no Centro Singular de Investigación en Química Biolóxica e Materiais Moleculares da USC (CiQUS), o equipo do profesor Fernández Megía será o responsable de deseñar, así como de executar, a estratexia de bioconxugación entre os distintos compoñentes que conforman a nanomedicina.

A tecnoloxía non-viral ENDOSCAPE proponse incrementar a eficacia terapéutica dos ácidos nucleicos, reducindo así os custos e mellorando a saúde dos pacientes, á vez que pretende fortalecer a competitividade europea neste campo científico.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.