As autoridades sanitarias españolas anunciaron a retirada do mercado dun lote de galletas de chocolate sen glute da marca Gerblé por conter escopolamina, coñecido como droga da burundanga, ademais de trazas do medicamento atropina. O lote afectado é o 51914913 con data de caducidade 20 de setembro de 2023 segundo alerta a Axencia Española de Seguridade Alimentaria e Nutrición (Aesan). As galletas foron distribuídas en Andorra e Francia, e foi desde último de onde procede o lote afectado. En Alemaña tamén se está facendo un seguimento desta alerta.
Segundo informa a Aesan, a distribución produciuse en todo o territorio nacional e a información foi trasladada ás autoridades competentes das comunidades autónomas a través do Sistema Coordinado de Intercambio Rápido de Información (SCIRI), co obxecto de que se verifique a retirada dos produtos afectados.
Foi Cataluña a primeira autonomía en dar a voz de alarma e avisou ao Sistema Coordinado de Intercambio Rápido de Información (Sciri). As autoridades recomendan que as persoas que teñan produtos afectados se absteñan de consumir as galletas.
Que é a burundanga?
A escopolamina, burundanga ou hioscina é un alcaloide tropánico cun alto nivel de toxicidade que se atopa como compoñente dalgunhas plantas. Os efectos desta droga son amplamente coñecidos polo seu uso na submisión química, polo seu efecto hipnótico e sedante.
En medicina, a escopolamina é utilizada en casos moi concretos para previr e tratar o mareo, as náuseas, a colite e os vómitos provocados por medios de transporte; na acción sedante sobre o sistema nervioso central; e para dilatar a pupila.
