Xoves 28 Marzo 2024

Dous galegos participan nun importante achado contra a diabetes

Un grupo de investigadores españois, entre os que se atopan os galegos Mabel Loza e José Brea, do grupo Biofarma da Universidade de Santiago de Compostela, participou no achado de activadores dunha posible diana terapéutica que trata a diabetes e evita a resistencia á insulina.

O achado, publicado en Cell Chemical Biology, e liderado polos investigadores Antonio Zorzano (Instituto de Investigación Biomédica de Barcelona) e Fernando Albericio (Universitat de Barcelona) describe a identificación de activadores da proteína mitocondrial Mitofusina 2 para o tratamento contra a diabetes de tipo 2. Esta proteína exprésase a niveis anormalmente baixos en tecidos de pacientes con diabetes. “Grazas aos estudos de cribado fenotípico e estudos de validación en células humanas, púidose demostrar o papel da proteína Mitofusina 2 no desenvolvemento de moitas das alteracións asociadas á diabetes”, explican os responsables do traballo á Axencia Sinc. Nos estudos participaron tamén biólogos e químicos  do CIBER de Madrid con experiencia en química sintética, cribado de moléculas e análise funcional.

Publicidade

A maior prevalencia da doenza e a maior resistencia dos pacientes á insulina obriga a buscar novos tratamentos

Un dos factores relevantes na resistencia á insulina é a aparición de disfunción mitocondrial. Estudos previos do grupo de Zorzano, describiron que a dinámica mitocondrial, a través de Mitofusina 2, xoga un papel central no mantemento da capacidade de resposta á insulina por parte das células. A investigación actual centrouse na procura de activadores de Mitofusina 2, “unha proteína presente en todas as mitocondrias das nosas células e que permite que estas xeren enerxía a partir dos nutrientes en función das condicións ambientais”, explica Zorzano.

“Esta proteína é unha regulador clave de moitas das funcións das mitocondrias, así como da célula no seu conxunto”, engade David Sebastián, membro do equipo investigador. Así, unha deficiencia en Mitofusina 2 conduce á aparición de resistencia á insulina, un dos defectos iniciais que conducen ao desenvolvemento da diabetes de tipo 2.

Resistencia á insulina

Os investigadores conclúen que a prevención da diminución nos niveis de Mitofusina 2 pode ser unha estratexia terapéutica relevante para impedir a aparición de resistencia á insulina en persoas susceptibles ou en pacientes diabéticos.

Aínda que existe un amplo arsenal terapéutico de fármacos antidiabéticos orais, en ocasións non é suficiente para manter un tratamento eficaz e faise necesaria a inxección diaria de insulina. Así mesmo, o incremento alarmante da prevalencia da diabetes de tipo 2 (DM2) asociada a un aumento de casos de pacientes diabéticos cunha resistencia á insulina moi severa ou pacientes que desenvolven a enfermidade moi pronto (antes dos 25 anos), fan que sexa necesario desenvolver novos tratamentos que impidan a progresión da DM2 e que permitan a implementación da Medicina Personalizada.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Sanidade ordena a retirada dun coñecido fármaco para a diabetes

A AEMPS comunicou que os motivos se relacionan por un defecto de calidade que “non supón un risco vital para o paciente"

Galicia notifica 10 mortes ao día por consumo de tabaco

A investigadora da USC Julia Rey Brandariz constata na súa tese que a comunidade galega é a duodécima que máis falecementos rexistra por esta substancia

África González: "Estamos moi cerca da cura de doenzas autoinmunes"

Os científicos ven posibles as terapias que restauren a tolerancia inmune en enfermidades como diabetes ou lupus

O aire en Europa é o máis seco dos últimos 400 anos

Unha investigación demostra que, desde principios do século XXI, se está a producir un desecamento xeralizado debido á actividade humana