“De todos os estudos de cancro de mama, en todos os estadios, en todos os momentos, de todos os subtipos, nunca houbo un fármaco que demostrase tanto beneficio como demostrou este”, afirmaba o investigador Javier Cortés, director do International Breast Cancer Center (IBCC), en referencia aos resultados do DESTINY Breast-03. Este estudo demostra que trastuzumab deruxtecan, un fármaco que actúa como un “cabalo de Troia”, é altamente eficaz contra o cancro de mama metastásico HER2-positivo, como tratamento de segunda liña.
O cancro de mama HER2-positivo representa ao redor do 15-20% do total dos casos de cancro mamario e é un subtipo que se caracteriza por unha elevada agresividade e alta capacidade proliferativa. Trastuzumab deruxtecan é un fármaco que combina a inmunoterapia (trastuzumab), un anticorpo monoclonal dirixido contra o receptor HER2, coa quimioterapia (deruxtecan), que é un derivado de exatecan, un potente inhibidor da topoisomerasa I. O anticorpo é capaz de entrar nas células tumorais e “enganalas”, xa que estas non detectan a quimioterapia. Unha vez dentro, o anticorpo libera a quimioterapia sen danar o tecido san.
Resultados
“Estamos probablemente ante os resultados máis relevantes e impactantes na historia do cancro de mama”, afirma Cortés. O estudo Destiny Breast-03 é un ensaio clínico de fase III, multicéntrico, randomizado e que incluíu a 524 pacientes. Os resultados amosan que o 75,8% das pacientes tratadas con traztuzumab deruxtecan en segunda liña conseguían manterse sen que a enfermidade progresase ou empeorase aos 12 meses, respecto ao 34,1% das pacientes tratadas co tratamento estándar actual.
Os resultados amosan que o 75,8% das pacientes tratadas con traztuzumab deruxtecan en segunda liña conseguían manterse sen que a enfermidade progresase ou empeorase aos 12 meses
Ademais, cabe destacar que segundo informa Cortés, “máis do 50% das pacientes mantéñense sen que a enfermidade metastásica empeore aos 24 meses”. O perfil de seguridade de trastuzumab deruxtecan é consistente co observado nos ensaios clínicos previos, sen que se evidenciaran novos problemas. “A toxicidade é manexable, aínda que 1 de cada 10 pacientes pode ter cadros de neumonía ou de inflamación pulmonar. É moi importante saber que esta toxicidade pode aparecer e sabela manexar ben”, sinala o doutor, quen afirma que se están levando a cabo estudos de calidade de vida con resultados preliminares favorables.
Pendentes da Axencia Europea do Medicamento
Polo momento, os resultados de DESTINY Breast-03 colocan a trastuzumab como o tratamento de elección de segunda liña para pacientes con cancro de mama metastásico HER2-positivo. Este fármaco xa fora preaprobado polas axencias reguladoras, só pendente de ser referendado pola presentación dun estudo de fase III, como o Destiny Breast 03, que xa tivo lugar esta fin de semana no marco do ESMO Congress 2021. Ante estes resultados, “supoñemos que proximamente a Axencia Europea do Medicamento (EMA) levará a cabo unha modificación da ficha técnica actual de trastuzumab deruxtecan e permitirá o seu uso en pacientes que recibisen previamente unha liña de tratamento”, revela Cortés.