Un equipo do IDIS acada 160.000 euros para loitar contra a dexeneración macular

A dexeneración macular asociada á idade (DMAE) é a principal causa de perda de visión a partir dos 65 anos e afecta a entre 30 e 50 millóns de persoas no mundo. Ante o envellecemento da poboación en moitos países, espérase que a súa prevalenza se duplique nas vindeiras décadas. A súa orixe ten múltiples factores, e eestá influenciada pola idade, orixe étnica e unha combinación de factores ambientais e xenéticos. Contra ela loitan un equipo de investigadores do Instituto de Investigacións Sanitarias de Santiago, que acaban de acadar 160.000 euros de financiamento para realizar un estudo sobre a DMAE.

No proxecto colaboran o CHUS e investigadores de Farmacia da USC

O equipo, composto por investigadores da Xerencia de Xestión Integrada de Santaigo pertencentes ao Servizo de Oftalmoloxía, Farmacia Hospitalaria, a Fundación Galega de Medicina Xenómica e grupo de bioinformática VARPA, é o único galego que acadou fondos do Instituto Carlos III para investigación en oftalmoloxía. O proxecto “Medicina personalizada na Dexeneración Macular Asociada á Idade (DMAE) en base a técnicas de Imaxe, Farmacocinética e Farmacoxenética” estará impulsado en colaboración con investigadores da Facultade de Farmacia da USC.

Publicidade

Obxectivos

O obxectivo principal da investigación é conseguir unha correcta estratificación da resposta ao tratamento co fármaco ranibizumab en pacientes con DMAE, usando para isto unha integración global de diferentes metodoloxías.

As inxeccións con 2 fármacos diferentes son o tratamento habitual contra a dexeneración macular. Con isto, a expectativa de recuperación visual é patente, pero non todos os pacientes melloran. Neste novo estudo, analizaranse as imaxes da retina con técnicas de visión artificial e, por outra banda, utilizaranse técnicas de farmacocinética e farmacoxenética para establecer un modelo poboacional que integrará a información dispoñible e avaliará os factores que expliquen as diferenzas entre as persoas que responden positivamente ao tratamento e as que non.

O estudo levarase a cabo no CHUS de Santiago, que en 2017 realizou 20.332 consultas e probas especiais a doentes con enfermidades retinianas, delas máis de 13.000 son inxeccións intraoculares. Fixéronse tamén 550 cirurxías de retina. O pasado ano o servizo de Oftalmoloxía do CHUS atendeu 120 novos doentes con patoloxía tumoral, o que xerou 674 visitas.

O proxecto apoiado polo Instituto Carlos III xa conta coa aprobación do Comité Autonómico Ético de Investigación Clínica (CEIC) de Galicia para a súa execución durante este mes de febreiro, e englóbase dentro dos obxectivos prioritarios da rede temática de investigación cooperativa en saúde OFTARED, e á acción estratéxica impulsada pola Fundación Retina Plus, denominada como “2017, ano da Retina en España”, a cal foi considerada polo Goberno de España como de “excepcional interese público”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un equipo de Santiago descobre unha nova terapia contra un cancro agresivo de tiroides

Un estudo do CiMUS publicado na revista 'Nature Communications' elimina de forma selectiva as células cancerosas sen danar as sas

Un estudo constata o potencial da dieta atlántica para reducir o risco de síndrome metabólica

A investigación foi realizada polo IDIS e publicada na revista científica 'JAMA Network'

Un equipo galego demostra que o estómago é capaz de regular o apetito e o peso corporal

O estudo do IDIS revela cambios substanciais na produción da proteína GDF15 a nivel gástrico vinculados coa obesidade, a idade e o xénero

Un equipo galego usa nanopartículas para mellorar o tratamento da fase aguda do ictus

Investigadores do IDIS e da USC reducen os efectos secundarios da única terapia farmacolóxica dispoñible para abordar a enfermidade