Martes 27 Febreiro 2024

Un equipo do CSIC mellora o coñecemento das infeccións bacterianas no abdome

O estudo identifica o agregado de células que impulsa a defensa antibacteriana na cavidade peritoneal

 

A cavidade peritoneal (o espazo entre a parede e os órganos abdominais) atópase exposta a graves patoloxías, polo que é crucial coñecer como o sistema inmunolóxico responde ante as enfermidades varias. A identificación desta resposta inmune é materia do estudo levado a cabo por un equipo do CSIC, que revisa o papel decisivo da formación de agregados de macrófagos peritoneais no control das infeccións bacterianas abdominais, xa que estes son capaces de recoñecer e eliminar células tumorais, microbios, restos celulares ou substancias extrañas.

A investigación, publicada na revista Immunity, ten por obxectivo axudar a comprender como, de maneira localizada, o sistema inmune actua fronte a enfermidades no abdome como a metástase de tumores de diversos cánceres ou a sepse, unha resposta desregulada do sistema inmune perante unha infección e “unha das principais causas de finamento en todo o mundo”, segundo explica Carlos Ardavín. O investigador do CSIC no Centro Nacional de Biotecnoloxía (CNB-CSIC) e cabeza do grupo de investigación engade: “coñecer os mecanismos desa resposta inmune é fundamental para poder combater estas infeccións abdominais”.

Mediante diversas técnicas, no traballo caracterízanse en detalle as estruturas encargadas de activar eses mecanismos, denominándoas resMØ-aggregates (do inglés: “resident macrophage aggregates”). “Estes agregados, que conteñen tamén linfocitos B e neutrófilos, son estruturas dinámicas cruciais para controlar as infeccións na cavidade peritoneal, posto que crean un microambiente no que as células poden realizar as súas funcións antimicrobianas”, sinala María López-Bravo, codirectora do equipo.

Laura Hernández Villarrubia Adrián Vega-Pérez, ambos coautores do traballo, explican como estas estructuras dependen da formación dunha rede de fibrina (unha proteína fibrosa que, xunto coas plaquetas, forma os coágulos sanguíneos) por activación dun proceso de coagulación extravascular, controlado polas células que cobren a cavidade peritoneal. Unha vez contida a infección, os macrófagos peritoneais colaboran na eliminación das células mortas presentes no interior dos agregados, contribuindo á desintegración destes mediante un proceso de fibrinólisis (degradación da fibrina para desfacer os coágulos sanguíneos).

Ardavín tamén subliña o cambio na localización dos macrófagos. Habitualmente libres no fluído peritoneal, estes pasan a formar os agregados, proporcionando un soporte que facilita a interacción e a función das células inmunitarias. Deste xeito, os resMØ proporcionan un armazón físico que permite un control eficiente da infección peritoneal, o que abre novas posibilidades respecto da organización da inmunidade antimicrobiana noutras cavidades do corpo, como a cavidade pleural ou os ventrículos cerebrais, así como para desenvolvemento de novas terapias.


Referencia: Resident macrophage-dependent immune cell scaffolds drive anti-bacterial defense in the peritoneal cavity (Publicado en Immunity).

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Confirmada a presenza de gripe aviaria por primeira vez na Antártida

O virus detectouse en mostras de aves mortas, achadas por científicos arxentinos nas proximidades da base 'Primavera'

As gaivotas trasladan centos de quilos de plástico dos vertedoiros ás reservas naturais

Un equipo internacional liderado pola Estación Biolóxica de Doñana do CSIC desenvolveu un modelo de deposición de residuos baseado na dieta e o movemento destas aves

Desenvolto un anticorpo que bloquea todas as variantes de SARS-CoV-2 no laboratorio

O equipo realizou a investigación a partir de mostras de sangue dun paciente infectado durante a primeira onda da pandemia

Un equipo con participación galega desenvolve un novo tipo de axente contra o cancro

O composto actúa de maneira potente e selectiva sobre a respiración mitocondrial das células nai do tumor, diminuíndo o seu potencial canceríxeno