Martes 5 Marzo 2024

“As augas termais retardan o avellentamento polo efecto antioxidante e antiinflamatorio”

A directora médica do Balneario de Mondariz, Laura Gómez San Miguel, dará este venres unha charla sobre hidroloxía termal a estudantes de Medicina

Expertos médicos, ao abeiro da Cátedra de Hidroloxía Médica USC-Balnearios de Galicia, aseguran que as augas termais “retardan o proceso de avellentamento debido ao seu efecto antioxidante e antiinflamatorio”. Tamén sosteñen que os tratamentos con augas mineromedicinais favorecen a reactivación da capacidade física e psíquica dos pacientes xeriáticos. Así o expón Laura Gómez San Miguel, directora médica do Balneario de Mondariz, onde esta fin de semana se celebrarán unhas xornadas sobre avellentamento en centros termais dirixidas a estudantes de Medicina.

“A hidroloxía médica, baseada no uso das augas mineromedicinais, constitúe unha ferramenta moi valiosa para a terceira idade, xa que contribúe a retardar a vellez, ao tempo que permite abordar certas patoloxías asociadas á idade”, manifesta a doutora. A clave está, segundo indica, no efecto antioxidante e antiinflamatorio das augas mineromedicinais, que “retardan o proceso de avellentamento”. Gómez San Miguel tamén indica que as augas termais axudan tanto á prevención de enfermidades como ao tratamento e rehabilitación no caso de patoloxías crónicas de tipo reumatolóxico, respiratorio e dermatolóxico.

Publicidade

Mellorar a calidade de vida

“Os balnearios, como centros sanitarios especializados na promoción da saúde, axudan a mellorar a calidade de vida dos pacientes. O seu eixe principal é a cura balnearia a través da auga mineromedicinal, pero tamén é importante todo o que implican as diferentes técnicas de balneación (bañeiras, aplicación de auga a presión, parafangos, inhalacións…); xunto cunha correcta orientación nutricional, actividade física ou deportiva axeitada, apoio psicolóxico, a relación directa médico-paciente e o propio ambiente relaxante que rodea ao balneario”, explica a doutora.

As xornadas comezan este venres ás 16:30 horas cunha charla da doutora Gómez sobre o balneario de Mondariz. Logo os asistentes farán un percorrido polas instalacións e terán a oportunidade de realizar unha sesión práctica no Palacio da Auga. O sábado pola mañá a directora médica do centro explicaralles os efectos terapéuticos da balneoterapia sobre os pacientes xeriátricos. A continuación, o recuperador físico do balneario de Mondariz, Jonás Rodríguez, abordará as aplicacións da hidroterapia como actividade física neste tipo de pacientes. A fisioterapeuta do balneario, Miriam Gómez, tratará as aplicacións da hidroterapia en fisioterapia no caso das persoas maiores. E ao final da mañá os futuros médicos terán unha sesión práctica para coñecer de preto estas aplicacións terapéuticas.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Os baños con auga mineromedicinal, beneficiosos para as persoas con fibromialxia

Unha tese da UVigo amosa a mellora en pacientes con esta enfermidade despois de 14 baños na piscina termal das Burgas

Un libro recolle as propiedades terapéuticas das augas minerais de Galicia

A USC e a Asociación de Balnearios de Galicia recollen os beneficios terapéuticos das augas dos centros termais