Martes 16 Abril 2024

Antonio Novo Campelo, impulsor do termalismo

O catedrático da Universidad de Santiago foi un gran divulgador dos balnearios do país e dos beneficios da hidroterapia

Foi unha das grandes figuras do termalismo en Galicia, que ademais de ser catedrático da USC e decano da súa Facultade de Medicina, chegou a dirixir os máis importantes centros balnearios do país: A Toxa, Verín e Baños de Molgas, ademais dos de Retortillo e Ledesma, en Salamanca. Nacido en Muros en 1878, Antonio Novo Campelo logrou en 1904, aos tres anos de terminar a carreira, o ingreso no corpo de Médicos de Baños, adxudicándose o número un.

A súa tese doutoral, lida en 1903, titulouse “Redución cruenta das luxacións traumáticas irredutibles” e, en 1907, gañou a praza de auxiliar numerario de Terapéutica e de Medicina legal da Facultade de Medicina de Santiago, obtendo a Cátedra de Terapéutica da Universidade de Zaragoza en 1909. Ademais, continuou coa súa formación internacional, ao ser pensionado pola Xunta para a Ampliación de Estudos (JAE) para unha estancia de oito meses en Berlín, no Instituto de Enfermidades Infecciosas baixo a dirección de Wassermann.

Publicidade

Novo Campelo.

Ao seu regreso, conseguiu a Cátedra de Terapéutica de Santiago e chegaría a ser decano da Facultade. A súa vida institucional universitaria non estivo exenta de polémicas, en especial con Roberto Nóvoa Santos, con quen mantivo unha longa e intensa discusión a conta da Cátedra de Patoloxía. Ademais, cedo adscribiu o seu ideario a unha radical militancia conservadora, á que ademais engadiu a súa loita contra a ‘galeguización’ do ensino na universidade compostelá, ata o punto de converterse en protagonista “da reacción máis furibunda” contra o galeguismo e o Estatuto, como sinala o investigador Rafael Sisto Edreira, nun aspecto que tamén puxo de manifesto o historiador Ricardo Gurriarán.

Neste sentido, o investigador Luís Rodríguez Mires, na súa monografía ‘Figuras galaicas do termalismo’, lembra que durante a súa etapa como catedrático, os seus alumnos da Universidade de Santiago dedicábanlle unhas coplas nas que castelanizaban o seu nome. “A pesar da súa recia personalidade e dos moitos merecementos e do respecto e admiración dos seus alumnos non se viu libre das pullas dos estudantes, os que lle dedicaron, castelanizando os seus apelidos, unhas rimas que comezaban así: Al doctor Nuevo Campito/ De una fama tan sonada/ Como la nariz de una vieja/ Que estuviese constipada.”, lembra esta biografía do médico muradán.

A súa principal obra de investigación publicada foi elaborada co seu colaborador Villarino Ulloa: o ‘Tratado de Farmacoloxía Experimental e Terapéutica’. Ademais, publicou numerosos artigos en revistas médicas e impartiu numerosos cursos sobre Hidroloxía Médica e Terapéutica Física na Facultade de Medicina.

Novo Campelo foi un gran divulgador do termalismo, de xeito que organizaba excursións nas que reunía a científicos de diversas áreas do coñecemento, especialmente da Universidade de Santiago, para visitar os grandes balnearios do país. A esta actividade corresponde a imaxe que encabeza esta reportaxe, tomada de revístaa ‘Vida Galega’ e na que visitan as termas de Cuntis en outubro de 1922, hai agora un século.

Neste sentido, Sisto Edreira, nunha monografía para o Álbum da Ciencia do Consello da Cultura Galega, salienta “os numerosos cursiños de Hidroloxía médica e Terapéutica física desenvolvidos por Novo na facultade de Medicina, así como o seu enorme labor de divulgación neste campo, que inclúe, entre moitas outras, unha conferencia na Sociedad de Hidrología en Madrid, na que foi presentado por Rodríguez Pinilla e que acadou grande sona na prensa madrileña. Tamén presentou un estudo no Congreso Internacional de Hidroloxía de Budapest”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

O economista Antón Costas ingresa na Academia de Ciencias

O vigués destaca a necesidade de crear “un novo contrato social focalizado en devolver dignidade e recoñecemento ao traballo”

A historia da primeira industria galega que empregou a máquina de vapor

Un estudo da USC analiza ‘La Victoria’, a descoñecida fábrica de fundición e louza da Coruña creada en 1844

As candorcas volven a Galicia e non se sabe o porqué: “Deberían chegar a finais do verán”

Os expertos detectan un cambio no comportamento destes cetáceos, que en primavera adoitan concentrarse no Estreito de Xibraltar

A UVigo lanza unha serie de podcast para concienciar sobre as doenzas cardiovasculares

As actividades, organizadas dentro do plan 'Ciencia de ida e volta', inclúen charlas en colexios e institutos