“O broche de ouro a sete anos de carreira”. Anxo Tato Arias, estudante de doutoramento da Escola de Enxeñaría de Telecomunicación, é un dos gañadores da XXXVI Edición dos Premios aos Mellores Proxectos de Fin de Carreira, Traballos de Fin de Máster, Teses de Doutoramento e Traxectorias Académicas en Enxeñaría de Telecomunicación outorgados polo Colegio Oficial de Ingenieros de Telecomunicación. Gañou na categoría Premio Hispasat ao Mellor proxecto fin de carreira en novas tecnoloxías para satélites de comunicacións e o vindeiro día 24 recollerá o galardón nunha cerimonia que se celebrará no Instituto de la Ingeniería de España.
“Para min o máis importante é a satisfacción de que valoren tan positivamente o meu traballo e poder poñer no currículo este premio”, subliña o mozo investigador, contratado polo centro de investigación AtlantTIC da Universidade de Vigo no marco do proxecto de I+D Táctica. Satisfeito e ilusionado, ten tamén palabras de agradecemento para o director do proxecto, o catedrático da Escola de Enxeñaría de Telecomunicación Carlos Mosquera, “o premio é tamén un recoñecemento ao seu bo facer”. Entregaranlles cadanseu diploma acreditativo e, a maiores, o autor do proxecto recibirá unha gratificación en metálico de 1000 euros.
Máis información no seguinte enlace:
http://duvi.uvigo.es/index.php?option=com_content&task=view&id=11459&Itemid=61
