A Real Academia Galega de Ciencias celebra este martes 5 de maio ás 19 horas a apertura do curso académico 2021, no Pazo de San Roque de Santiago de Compostela. No acto tamén se celebrará o nomeamento do presidente de honra da institución, Miguel Ángel Ríos Fernández, que dirixiu a entidade entre 2014 e 2019, impulsando un importante cambio e unha notoria modernización na institución.
Ao acto deste martes asistirán o presidente da RAGC, Juan Lema, e o resto do equipo de goberno da Academia, outras académicas e académicos e diversas autoridades como o reitor da Universidade de Santiago (USC), Antonio López; a directora da Axencia Galega de Innovación (GAIN), Patricia Argerey; e o secretario Xeral de Universidades da Xunta de Galicia, José Alberto Díez de Castro.
O evento contará cunha lección maxistral por videoconferencia a cargo do profesor e doutor Juan Quintás Seoane, titulada “A globalización en transición”. No marco desta celebración, a RAGC procederá a oficializar o nomeamento do presidente de honra da institución, o catedrático emérito de Química Física da Universidade de Santiago de Compostela (USC), Miguel Ángel Ríos Fernández.
O profesor Ríos, nacido en Ponte Ulla, é licenciado e doutor en Ciencias Químicas pola Universidade de Santiago. Foi Premio Extraordinario de Licenciatura e Doutoramento e está en posesión da Insignia de Ouro da USC, institución da que tamén é catedrático emérito. Foi bolseiro da Fundación Juan Marcha, e especializouse na Universidade de Kent (Reino Unido). É considerado o impulsor da Química Cuántica en Galicia. Como secretario xeral de Investigación da Xunta foi o creador dos primeiros plans de I+D+i en Galicia. Foi tamén presidente do Centro de Supercomputación de Galicia (Cesga). No seu grupo de investigación instalouse o primeiro ordenador vectorial que chegou a Galicia, un Convex C-120. Baixo a súa dirección directa formaronse cinco Catedráticos de Universidade e sete Profesores Titulares das tres Universidades galegas. Dirixiu numerosas teses de doutoramento doctorais e publicou traballos de investigación en revistas de prestixio internacional.
O evento tamén poderá seguirse en directo a través da canle de Youtube da RAGC.
