Este verán, do 2 ao 8 de xullo, o campus Terra da USC acollerá a quinta edición de Xuvenciencia, un programa organizado e promovido polo profesorado da sede universitaria luguesa en colaboración coa Vicerreitoría de Coordinación. A iniciativa pretende achegar ao estudantado preuniversitario a realidade do campus, a oferta de estudos, os servizos e as investigacións desenvolvidas nel.
A Vicerreitoría de Coordinación de Lugo acolle este xoves, ás 11.30 horas, a presentación desta nova edición. Estarán presentes o vicerreitor de Desenvolvemento Científico e Tecnolóxico do campus de Lugo, Andrés Barreiro Lois; o secretario xeral de Universidades, José Alberto Díez de Castro; representantes de Deputación e Concello de Lugo, Carlota López, en representación da empresa patrocinadora Aresa, xunto á profesora da USC e coordinadora do campus de verán Xuvenciencia, Mercedes Novo Rodríguez,
O prazo de inscrición no programa, para o que se ofrecen 135 prazas, ábrese este venres 28 de abril ás 16:00 horas e péchase o 8 de maio, ás 24:00 horas. O fomento da convivencia constitúe un dos principais valores que se pretende impulsar dende o Campus e por iso nesta edición óptase por ofertar un maior número de prazas con aloxamento.
