O binomio diabetes e obesidade, protagonista do congreso de Biocaps en Vigo

Foi denominada polos nutricionistas como a confluencia das dúas peores epidemias do século XXI nos países desenvolvidos, por iso a suma de diabetes e obesidade conta xa cun termo propio: a diabesidade. O Instituto de Investigación Biomédica (IBI) dedicará o terceiro congreso do proxecto Biocaps a esta doenza combinada, unha cita que terá lugar entre os días 22 e 24 de outubro no Centro Social Afundación de Vigo. A inscrición, de carácter gratuíto, está aberta.
Aínda que non existen datos sobre o número de diabesos que hai en España, sábese que o 25% da poboación padece obesidade e o 13% diabetes e que cada vez son máis frecuentes os casos nos que ambos os dous trastornos aparecen de forma combinada, en gran parte debido ao estilo de vida sedentario e aos malos hábitos alimenticios. A relación é clara: o aumento de peso é o principal factor de risco para a aparición de diabetes mellitus tipo 2 porque un incremento do tecido adiposo xera resistencia á insulina, situación que ocasiona que esta hormona sexa incapaz de realizar correctamente a súa función nos diferentes tecidos do organismo. Como consecuencia, xorde a hiperglicemia e o desenvolvemento de diabetes.
Os expertos que participarán como relatores no congreso, que terá como idioma oficial o inglés, proceden de Alemaña, Reino Unido, Suecia, Francia, Italia, Portugal, Irlanda, Austria e España. Do mesmo xeito que nas dúas edicións anteriores, converterase nun punto de encontro de alcance internacional para o intercambio de coñecemento entre investigadores, xestores de transferencia e innovación, empresas e organismos públicos do ámbito da saúde.
Máis información no seguinte enlace: