O vindeiro mércores 7 celébrase en Santiago de Compostela unha nova edición das Nerd Nites, sesións nocturnas de divulgación científica organizadas pola USC. Nesta ocasión, as Nerd Nites cambian de ubicación, e trasládanse á cafetaría Lasso, no Auditorio de Galicia (Campus Norte).
A partir das 21 horas, participarán tres expertos en diferentes materias. A especialista en conduta animal María Sabell Sierra abordará a cuestión ‘ Como atopou o can ao home?’; o director do Centro de Estudios de Seguridade (CESEG) e ex Valedor do Pobo, José Julio Fernández Rodríguez, con ‘Que facemos coa seguridade internacional? Nin arre nin xo’; e a bióloga da conservación, educadora para a prevención do VIH e produtora audiovisual Xiana Fernández-Albor Batallán coa cuestión ‘Por que as candorcas pasan pola menopausa?’.
A entrada é libre e gratuita.
