O antropólogo danés Gustav Henningsen (1934-2023) faleceu a madrugada do mércores 18 de outubro na cidade de Lyngby, en Dinamarca. É considerado o maior experto mundial da Inquisición e dos fenómenos relacionados coa bruxería. A vida do recoñecido historiador sempre estivo moi vinculada a Galicia. Xunto coa súa dona, Marisa Rey, e os seus fillos, cambiou Dinamarca polo concello de Ordes, na parroquia de Ardemil, entre os anos 1965 e 1968. O seu obxectivo era estudar o folclore galego para facer a súa tese de doutoramento. Chegou a Galicia a mediados dos sesenta grazas a unha bolsa da Universidade de Copenhague que lle permitiu estudar as crenzas e tradición orais relativas á bruxería. Percorreu Galicia, fotografando e rexistrando na súa gravadora as lendas galegas. Un dos seus traballos máis recoñecidos foi o estudo dos exorcismos no santuario do Corpiño, en Lalín.
Marisa Rey contaba a GCiencia en maio deste ano que Henningsen levaba anos enfermo. Ela relataba as súas experiencias no Corpiño e como Henningsen levou a cabo un labor incansable e encomiable de rexistro e documentación antropolóxica. Aínda que finalmente realizou a súa tese de doutoramento sobre os documentos do inquisidor Salazar Frías, os tres anos que viviu en Galicia permitíronlle deixar un legado documental de incalculable valor. De feito, Henningsen e Rey doaron máis de 2.000 fotografías, hoxe depositadas no Museo do Pobo Galego baixo o nome de Fondo Fotográfico Gustav e Marisa Rey-Henningsen. O matrimonio tamén cedeu boa parte do material sonoro gravado en Galicia ao Instituto da Lingua Galega, dende onde se transcribiron máis de 150 horas de gravacións.
Tanto dende o Museo do Pobo Galego como dende o ILG transmitiron as súas condolencias á familia do recoñecido antropólogo. “As doazóns desinteresadas que tanto Gustav como a súa esposa, Marisa Rey, acordaron coas diferentes institucións son fiel reflexo da xenerosidade e do enorme interese do matrimonio pola Antropoloxía, a súa investigación e súa difusión”, indica unha nota difundida polo Museo do Polo Galego con motivo do falecemento de Henningsen. Ambas entidades poñen en valor o interese do antropólogo danés por estudar e rexistrar as tradicións galegas, converténdose xa nun testemuño de incalculable valor da Galicia de mediados de século.
