Andrea Muras e María Canosa serán as poñentes nos faladoiros de Afundación TV.
Andrea Muras e María Canosa serán as poñentes nos faladoiros de Afundación TV.

María Canosa e Andrea Muras, nos faladoiros de ciencia de Afundación TV

As expertas divulgarán aspectos das materias nas que traballan en encontros virtuais que terán lugar os días 19 e 26 de outubro

A través da canle Afundación TV, a Obra Social Abanca iniciará nos vindeiros días unha nova xeira do seu programa de divulgación, co obxectivo de fomentar o coñecemento e respecto do medio. Farao coa participación das investigadoras María Canosa e Andrea Muras no ciclo Falamos de ciencia? Faladoiros para coñecer o mundo. Estes encontros, segundo expón Afundación, “constitúen unha ocasión para aprender sobre diferentes aspectos científicos e as súas aplicacións, desde unha ollada distendida, mais sempre rigorosa, da man de divulgadoras profesionais”. Están dirixidas tanto a público xuvenil como adulto, que pode interactuar en liña para resolver dúbidas,e abordaranse, nestes dous casos, aspectos curiosos que abranguen desde as construcións da antigüidade ata o mundo microscópico dos patóxenos.

O primeiro encontro será con Andrea Muras, doutora en Acuicultura e Biotecnoloxía, o vindeiro luns 19 de outubro ás 19.00 horas e versará sobre O moito que molan as bacterias. “Durante gran parte da miña vida considerei aos microorganismos en xeral e ás bacterias en particular como seres sinxelos e aburridos”, explica a investigadora. Porén,  “estes pequenos seres non son tan simples como podería parecer. As bacterias son capaces de vivir en calquera parte, e ademais desenvolveron non só unha, senón varias linguaxes que lles permiten coordinarse e facer cousas asombrosas”, apunta.

Muras é experta en Microbioloxía, e durante a súa tese tivo a oportunidade de realizar estancias científicas en Israel e nos Países Baixos. En 2016 recibiu o Premio á Transferencia de Tecnoloxía de Galicia, por un traballo de investigación aplicada sobre novas estratexias para a prevención e o tratamento de enfermidades orais bacterianas. Desde o 2018 desenvolve unha intensa actividade divulgadora centrada nas peculiaridades da vida bacteriana a través do seu espazo Ciencia Miúda.

O seguinte luns, 26 de outubro, ás 19 horas, a enxeñeira de Camiños, Canais e Portos María Canosa Blanco ofrecerá o relatorio A física desde as construcións romanas ata hoxe. O cemento e o formigón. Nel afondarase na historia do formigón, un material que se usou ao longo dos séculos, e isto explícase pola súas propiedades físicas. Os romanos foron os precursores do formigón, pero non o usaban tal como se usa hoxe. Era un cemento con cinzas volcánicas. Como di a Canosa, a resistencia explica a persistencia. Polo seu comportamento resistente a compresión. Mais ten unha debilidade, a tracción.

Canosa traballou en distintas áreas desta disciplina, tanto en oficina técnica, coma en construción de obras, así como na elaboración de distintos proxectos. Ademais, desde pequena estivo vencellada á literatura, na que salientou en distintos concursos de contos e poesía desde a idade de 8 anos. Escribiu a súa primeira novela con 13 anos. Os seus traballos literarios abranguen o ámbito infantil, xuvenil e de adultos, e os xéneros de poesía, conto, novela, relato, ensaio e teatro. Tamén desde moi nova impartiu charlas e obradoiros por toda a comunidade, ben de fomento da lectura, ben a través dos seus libros, ben de creación literaria.


As inscricións para os faladoiros de Afundación TV poden realizarse nesta ligazón.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.