A organización de Galiciencia, a maior feira científica de Galicia, manterá aberto ata o vindeiro 22 de outubro o prazo de inscripción para os proxectos interesados en participar no evento. Na feira, que terá lugar na Tecnópole de San Cibrao das Viñas entre o 22 e o 24 de novembro, participarán os 80 proxectos seleccionados. 50 deles, de Secundaria, Bacharelato e FP, optarán aos premios do certame, e 30 de Primaria e Educación Especial estarán tamén presentes, pero fóra de concurso.
As bases para os proxectos interesados están xa dispoñibles en galiciencia.com. Para garantir unha representación equitativa e diversa dos centros de toda Galicia, cada un deles poderá presentar un máximo de catro proxectos. Deberanse formar equipos de dous alumnos e un profesor, que terán que expoñer a súa idea no formulario de inscrición, sexa un proxecto experimental e tecnolóxico ou un traballo documental.
Coa apertura do prazo de presentación, a feira continúa coa preparación da edición de 2017, que xa comezou hai uns meses co desafío “Atrévete coa astronomía!”. Ademais, en outubro retomarán a súa actividade as Aulas Tecnópole, sesións semanais abertas a todas as áreas do coñecemento.
Galiciencia está apoiada, un ano máis, pola Consellería de Economía, Emprego e Industria –a través da Axencia Galega de Innovación (Gain)–, e a Fundación Española para a Ciencia e a Tecnoloxía (Fecyt).
