O tren de borrascas continúa a toda máquina sobre Galicia este xaneiro. Tras o paso de Hortensia, chega agora a Justine, convertida en cicloxénese explosiva, que entrará en Galicia a última hora deste xoves, aínda que os efectos máis importantes van ser evidentes o venres, aínda que poderían persistir o sábado, segundo indicou Meteogalicia.
Serás unhas xornadas nas que se esperan intensas choivas e fortes refachos de vento. Os primeiros efectos da formación de Justine deixaranse sentir xa este mércores na zona da Mariña, en Lugo, onde está activado o aviso amarelo a partir das 18,00 horas por refachos superiores aos 80 km/h.
Este aviso amarelo vai manterse para o xoves na comarca lucense, yque ampliarase, a partir das 09,00 h por ventos do suroeste, combinados con forza 7 na Costa da Morte e a costa noroeste da Coruña.
Pero o impacto principal da borrasca tocará Galicia o venres e durante as primeiras horas do sábado. Justine recibe a denominación de ‘explosiva’ pola rapidez coa que se forma e como se moverá, o que dificulta prognosticar, tanto a súa traxectoria exacta, como os seus efectos.
Antes da chegada da #BorrascaJustine a #Galicia na tarde-noite do venres hoxe mércores teremos un día moi tranquilo. Ceos nubrados, algún orballo no oeste e momentos de sol en puntos do leste e do norte.
Destacará de novo a temperatura que rozará os 20ºC de máxima no interior📈 pic.twitter.com/RZRuMXcLOX— MeteoGalicia (@MeteoGalicia) January 27, 2021
Para a xornada do venres, Meteogalicia xa activou aviso laranxa por ventos moi fortes no litoral da Costa da Morte e o norte da Coruña. Pero a natureza ‘exploxiva’ de Justine fai que a situación poida cambiar nas vindeiras horas, mesmo con avisos máis imporantes.
Pola súa banda, a Axencia Estatal de Meteoroloxía ( Aemet), mantén para o venres a alerta amarela en toda Galicia por fortes ventos, con refachos de ata 80 km/ h, e na provincia da Coruña. A iso súmase un aviso da mesma intensidade no mar, con ventos do sur ou suroeste de forza 7.
Aquí podes consultar o boletín de avisos de Meteogalicia
