A Axencia Estatal de Meteoroloxía (Aemet) advertiu este martes de episodios de tormentas con aparello eléctrico e mesmo pedrazo no leste de Galicia durante as xornadas do mércores e o xoves. O nivel de alerta chegará a ser laranxa na segunda metade do mércores na montaña de Lugo, debido aos lóstregos e ás precipitacións, que poden caer tamén en forma de sarabia e que poderían acumular ata 15 litros por metro cadrado nunha hora. O aviso será amarelo no resto da provincia de Lugo (agás A Mariña) e boa parte da provincia de Ourense. Parte desta provincia mantense durante este martes con aviso amarelo por altas temperaturas. Con todo, a noite previa a San Xoán será apacible e agradable en toda Galicia.
A partir de mañá unha vaguada atlántica afectaranos, xerando inestabilidade en moitas zonas da Península (Z/T 500 hpA. HRES-IFS) pic.twitter.com/GTiHVFfypW
— AEMET_Galicia (@AEMET_Galicia) June 23, 2020
Segundo explica o parte de MeteoGalicia, a situación vén dada pola entrada de aire frío en altura e aire húmido no litoral, mentres se está retirando o anticiclón. Así, aínda que o día de San Xoán amencerá con ceos abertos (agás néboas puntuais no litoral), a partir do mediodía medrarán nubes de evolución no interior de Galicia que deixarán chuvascos, localmente fortes e con aparato eléctrico. Así, as temperaturas descenderán entre lixeira e moderadamente.
O aviso amarelo manterase durante o xoves, entre as 12 e as 21 horas nas zonas de montaña de Lugo e Ourense e o sur das dúas provincias. Neste día manterase a inestabilidade atmosférica, con aire cálido en superficie e aire frío en altura. O venres chegará unha fronte fría polo oeste con moita humidade, o que provocará, ademais de precipitacións, un descenso moderado nas temperaturas mínimas e notable nas máximas.