A Aula Magna da Facultade de Matemáticas da USC acollerá este xoves 18 e venres 19 unha conferencia por partida dobre a cargo de Luis Rández, catedrático da Universidad de Zaragoza e director do Instituto Univesitario de Matemáticas y Aplicaciones desta institución. A conferencia levará por título “Matemáticas y Arte“, e nela, Rández contará como se utilizaron ao longo da historia as matemáticas, tanto na construción como na decoración de monumentos desde a arte románica e gótica.
As sesións, que comezarán ás 11.30 horas, tamén incluirán unha breve descrición dos conceptos matemáticos básicos precisos e ilustrarase con fotografías e planos o seu uso en diversas obras de referencia de arquitectura e enxeñaría.
Na segunda parte da conferencia, presentarase a curtametraxe de animación Ars Qubica, que amosa a presenza da xeometría e as matemáticos na arte. Así, explícase como usando a figura dun cubo como fío condutor, vese que ao ser cortado por un plano, pode dar lugar a un cadrado, un triángulo equilátero, un pentágono non regular ou un hexágono.
A conferencia de Luis Rández enmárcase no ciclo de conferencias divulgativas do International
Congress on Industrial and Applied Mathematics (Iciam). No acto colaboran a Sociedade Española de Matemática Aplicada (Sema) e a Asociación galega de Profesorado de Educación Matemática (Agapema).
A actividade está dirixida a estudantes e ensino medio, e para o público en xeral interesado polo binomio entre matemáticas e arte. Na sesión do xoves, Rández será presentado pola decana da Facultade de Matemáticas, M.
Elena Vázquez Cendón, e o venres 19, polo presidente de Agapema, Julio Rodríguez.
