Únete á nosa canle de Whatsapp
O Consello Superior de Investigacións Científicas continúa este xoves 5 de outubro, en Santiago de Compostela, co ciclo de conferencias ‘Que sabemos de?‘, iniciativa para construír unha contorna de diálogo entre a comunidade científica do CSIC e a sociedade.
Ás 19.00 horas na sede do IEGPS (San Roque, 2) o profesor de investigación do CSIC Antonio Figueras Huerta impartirá a conferencia ‘Biotecnoloxía e acuicultura: máis aló dos transxénicos’.
Antonio Figueras Huerta é doutor e licenciado en Bioloxía pola Universidade de Santiago de Compostela. Científico do CSIC desde 1987, na actualidade é profesor de investigación e director do Instituto de Investigacións Mariñas (CSIC, Vigo).
Desenvolve o seu labor no grupo de investigación Inmunología e Xenómica do IIM, que ten por obxectivos incrementar o coñecemento sobre o transcriptoma e proteómica da resposta inmune de peixes e moluscos fronte a patóxenos, identificar xenes que se poidan empregar como marcadores en procesos de selección xenética e mellorar a resposta inmune mediante o uso de inmunoestimulantes e vacinas. Dirixe tamén o Laboratorio Nacional de Referencia de Enfermidades de Moluscos Bivalvos.
Foi o coordinador do proxecto Consolider ‘Aquagenomics‘, financiado con seis millóns de euros e no que participaron 18 grupos de investigación. Na actualidade é o investigador principal, entre outros proxectos, de ‘Mellora da produción en acuicultura mediante ferramentas de biotecnoloxía’ e ‘Secuenciación do xenoma do mexillón galego‘. En canto á súa experiencia no campo da xestión, foi vicepresidente de Investigación Científica e Técnica do CSIC (2012-2014).
Figueras dirixe o equipo do CSIC que está a secuenciar o xenoma do mexillón
No seu relatorio explicará que, nun contexto caracterizado pola sobreexplotación dos caladoiros internacionais e un nivel de capturas procedente das actividades pesqueiras que chegou practicamente ao máximo que pode alcanzarse, a biotecnoloxía podería axudar a conseguir unha produción economicamente rendible de animais sans cun impacto ambiental limitado.
“A produción acuícola española é liderada por Galicia e, con todo, a aposta pola biotecnoloxía mariña é un dos grandes desafíos pendentes da investigación nesta comunidade autónoma. A estratexia de especialización intelixente (RIS3) e a de Blue Growth da Unión Europa é unha estupenda oportunidade para unir o potencial investigador galego para avanzar decididamente nesta dirección. Poucas son as autonomías en España que reúnen as potencialidades de Galicia nesta actividade científica e na industria”, destaca Figueras.
Tamén incidirá nas posibilidades que brinda a biotecnoloxía para aproveitar todo o que teñen os seres vivos no noso beneficio e non só na produción de animais para o consumo. Así, poñerá exemplos de uso dos recursos do mar como fonte de produtos naturais ou mesmo como enerxías alternativas.
Figueras dirixe o Laboratorio de Referencia Nacional en doenzas de bivalvos
“Nos mexillóns descubriuse unha nova clase de péptidos antimicrobianos, con actividades antivirais e antibacterianas, chamada myticina C. Os peixes cebra son vertebrados, como os ratos, e por tanto máis próximos aos seres humanos que as moscas ou os vermes. Con todo, a diferenza dos ratos, os peixes cebra son moi baratos de criar e manter. Estas características convérteno nun modelo óptimo para o estudo da resposta inmune en especies de interese na acuicultura e como modelo en distintos aspectos de biomedicina para estudar doenzas no ser humano, como a leucemia e o melanoma”, avanza.
O ciclo, que se iniciou o 22 de setembro cunha conferencia a cargo de Alfredo Alvar (Centro de Ciencias Humanas e Sociais), continuará tras a conferencia de Antonio Figueras os seguintes días en horario de tarde (19.00 horas) cos seguintes relatores e temas.
O 13 de outubro Carmen Martínez (Misión Biolóxica de Galicia) falará sobre “A vide, o viño e o CSIC”; o 20 de outubro Rosa Menéndez (Instituto Nacional do Carbón), pronunciará a conferencia “O grafeno”; o 27 de outubro con Ana Martínez (Instituto de Química Médica) disertará acerca de “O Alzheimer”, e o 4 de novembro con Francisco Javier Martín-Torres (Instituto Andaluz de Ciencias da Terra) pronunciará a conferencia “A vida no universo”.
