O Consello Superior de Investigacións Científicas (CSIC) pon en marcha a novena edición do seu concurso de relatos de ficción científica Inspiraciencia, que fomenta a creatividade literaria vinculada á ciencia. Poderanse presentar ao certame textos de ata 800 palabras que estean escritos nalgunha das catro linguas cooficiais do Estado (galego, castelán, éuscaro ou catalán).
A iniciativa, na que tamén colaboran as diferentes delegacións do CSIC, a Fecyt e o Ministerio de Ciencia, Innovación e Universidades, conta en Galicia co apoio da Asociación de Escritoras e Escritores en Lingua Galega (AELG) e a Editorial Galaxia. O seu obxectivo é fomentar a creación literaria de ficción como forma libre e persoal de achegamento ao pensamento científico e de explorar realidades antes non imaxinadas.
Haberá dúas categorías:para mozas e mozos (de 12 a 17 anos) ou persoas adultas (a partir de 18 anos). O prazo de presentación de relatos finaliza o 19 de xuño.
Toda a información sobre Inspiraciencia pode consultarse na súa páxina web, nesta ligazón.
