O profesor da Universidade da Coruña (UDC) Carlos Gómez Rodríguez acaba de obter o Premio Nacional de Investigación para Jóvenes María Andresa Casamayor, na área de Matemáticas e Tecnoloxías da Información e as Comunicacións (TIC) que outorga o Ministerio de Ciencia e Innovación.
O investigador foi recoñecido “pola orixinalidade e o impacto das súas achegas ao desenvolvemento de algoritmos que incorporan a linguaxe natural a contornas dixitais propios da intelixencia artificial”, segundo destaca a nota emitida polo Ministerio.
Para Carlos Gómez “este premio é un recoñecemento que non esperaba e que sempre é benvido”, confesando estar “encantado”. A súa traxectoria investigadora é o Procesamento da Linguaxe Natural, en particular a análise sintáctica, “moi interesante pois contribúe a que os ordenadores poidan traballar coa linguaxe humana, de forma que se comuniquen con nós de forma máis efectiva”, explica.
O desenvolvemento de sistemas de procesamento da linguaxe multilingües e eficientes é especialmente importante para linguas que non contan con grandes mercados ou abundancia de recursos, como é o caso do galego, incide o investigador.
Outros gañadores
Xunto con Carlos Gómez, foron recoñecidos outros nove investigadores novos, entre os que hai outra galega, a investigadora da Universidade de Vigo Belén Riveiro. Á convocatoria presentáronse 185 candidaturas. Estes premios son o recoñecemento máis importante de España no ámbito da investigación científica. Segundo destacou a ministra Diana Morant, estes galardóns poñen en valor a ciencia que se fai en España grazas ao labor de investigadores con carreiras excepcionais, que dedican a súa vida a xerar coñecemento e a trasladalo en aplicacións para a sociedade. Os galardóns, dotados con 30.000 euros en cada modalidade, están dirixidos a investigadores de menos de corenta anos, que estean desenvolvendo un labor relevante e recoñecido internacionalmente nunha institución española.
