Os servizos de publicacións das universidades de Santiago de Compostela e da Coruña veñen de editar o libro “Fronteras de agua. Las ciudades portuarias y su universo cultural (siglos XIV-XXI)”, coordinado por Manuel-Reyes García Hurtado e Ofelia Rey Castelo.
Este volume xorde da idea de tratar o universo cultural dos portos atlánticos, cunha complexa materialización, xa que se entrecruzan a mobilidade das persoas, a trasfega constante dos portos, a permeabilidade dos comportamentos e dos hábitos e costumes, o luxo de saberes e destrezas, a diversidade de idiomas, os niveis culturais, as inquietudes relixiosas, as militancias políticas, etc. A documentación responde mal a moitas destas cuestións ou só en situacións de tensións motivadas por conflitos ou por controis externos. Con todo, esta dificultade é a que achega unha dose de risco e de atractivo a un ámbito temático que merecerá, sen dúbida, un esforzo investigador cada vez maior e máis imaxinativo.
Ademais da novidade do tema que desenvolve este libro, coordinado polo profesor e director do departamento de Humanidades, ten a singularidade de ser a primeira obra publicada en colaboración entre a USC e a UDC.