Únete á nosa canle de Whatsapp
Con gallo do Día Mundial do Libro e do IV centenario da morte de Miguel de Cervantes, a Universidade da Coruña organiza o venres 22 de abril unha lectura multilingüe do primeiro parágrafo de El Quijote, na que participarán alumnado estranxeiro da UDC e membros do profesorado lendo o fragmento nas súas respectivas linguas de orixe. A lectura pecharase coa actuación do coro universitario.
O acto, de carácter público, terá lugar ás 12 horas no Paraninfo da Universidade, na Maestranza.
O reitor, Julio Abalde, iniciará a lectura co texto orixinal en español, e o seguirá o secretario Xeral, Carlos Aymerich, coa lectura do fragmento en galego. A continuación, intervirán alumnos e profesores que lerán o primeiro parágrafo en sueco, albanés, francés, ruso, chinés, catalán, alemán, italiano, polaco, latín, portugués, vietnamita, romanés, turco, xeorxiano e lingua de signos, co presidente da Asociación de persoas xordas de Galicia.
